Tuesday, November 6, 2012

فاطيمه علي









لو لمست الوجه ده بطرف السبابه حتلاقي الطرف اتغطي شيكولاته لو دوقتها حياتك حتتغير تماما وحتعرف ان في بهجه في الحياه انت لسه مجربتهاش





Tuesday, October 30, 2012

افيالجو





الكتابه دائما عن الاقليات العرقيه ومشاكلها بياكل مع الناس وبيثير تعاطف الجماهير وبالذات الخوض في فكره التهميش والاضطهاد المؤسسي او المجتمعي واي محاوله لأثبات عكس ده او تبسيط الامر وجعلها قضيه عامه غير محصوره ومقصوده لفئه معينه بتحول النقاش او المقال لشيء بضين غير جذاب للقارئ المتحمس لسماع حواديت الاضطهاد والتهميش وعلشان كده النهارده في يوم التدوين عن النوبه ححاول اجيب ( كصص ) وحواديت عنصريه تعجبكم وتسري عنكم وحدتكم وفي نفس الوقت ممكن تكون سبب في ان ورق الهجره بتاعي يتقبل علي اساس اني اتبع اقليه عرقيه ومضطهد  في دوله ناميه نجح فيها تيار الاسلام السياسي في تولي الحكم والحبرشه علي الاقليات .



اللقب
اي مراهق نوبي لازم يكون مره لبس في واحد اطلق عليه لقب سامبو او زنجيري ، قله بتطلقها من باب التلطف والدعابه ولكن الغالبيه بتقولها كنوع من الدفاع عن النفس المتاح دائما في حالات الخساره من المراهق النوبي سواء في ماتش بلاي ستيشن او في مناقشه كلاميه ودايما اللقب ده بيعجب الاخرين علي اساس ان المراهق ده فعلا سامبو او زنجيري



الفقره النوبيه
كونك حبه سمرا بيفرض عليك انك تكون حامل لواء الفقره النوبيه في اي فرح جوربتي بتروحه ، الجماهير العنصريه بتفرض عليك انك تقعد تتهز وتتحرك حركات سرياليه بمجرد ما الدي جي مان يشغل نعناع الجنينه او شمندوره او حتي كده كده يا تريلا في فتره سابقه .. هنا بقي بتحسد الاصدقاء الجوربتيه اللي قاعدين يتفرجو علي الفقره النوبيه اللي بتقدمها وهما بيضربو الشربات ومتشفيين فيك



ضد الشمس
القناعه اللي مترسخه عن الجماهير العنصريه ان البني ادم المواطن الطبيعي بيستخبي من الشمس ويقف في الضل علشان بس ميسمرش ، علشان كده انت لو اسمر من المنطقي انك تترمي في الشمس اطول فتره ممكنه بدون اي شفقه علشان موضوع السمار ده مش فارق معاك اساسا لانك اسمر اساسا .... اي عمل يتطلب الانتظار في الشمس لفترات طويله بيصدرو الحبه السمرا دايما  وبتبقي الضماير مرتاحه


حلوه بس سمره
متخيل تماما تحطم طموح اي فتاه سمراء في الارتباط بشاب جوربتي ابيض علشان امه وأصحابه مش حيرضو انه ياخد واحده سمرا خصوصا ان الحاجه وصاحبات الحاجه في المسجد بيجيبوله عرايس بيضا زي القشطه والزند بتاعهم مش باين وعرقوب القدم ملفوف ومربرب


اللغه
دايما الاحراج بيكون لما تقعد وسط الشله وبعدين يجي شاب جوربتي يقول جمله بسرعه ومحدش يفهمها يقوم واحد رادد عليه ويقوله " متبطل تتكلم زي البرابره يا فلان " ويروح باصصلك ويقولك " لا مؤاخذه مش قصدي عليك والله " وابتسامه صفرا بت وسخه



اصحاب شباب الجمعيه
حمله دبلومات الثانوي الفني او التجاري من النوبيين في فتره الثمانينات واوائل التسعينات بيتلمو علي اوسخ فئه من شباب الجوربتيه لان بيكون عندهم احساس ساحق بالدونيه وبالتالي فئه الجوربتيه الوسخه دي هي اللي بترضي تصاحبهم ، النوبيين اللي معاهم دبلومات دول بيروحو جمعيات القبائل وبيشاركو في الانشطه وبيطلق عليهم لقب شهير " شباب الجمعيه " الفئه دي بالاضافه لغبائها المطلق بتجيب الاوساخ الجوربتيه دول يشاركونا في الانشطه وبيطلعو ميتينا ، جيل شباب الجمعيه دي تجاوز ال 40 ولسه بيطلق عليهم لقب " شباب الجمعيه " ولسه هما واصحابهم الجوربتيه الاوساخ بيزاحمونا في الانشطه



جوربتي : يقصد بها الغير نوبيين 



الصور للعزيز شكري مناع




Tuesday, September 25, 2012

الم خفيف زي ازازه شفافه فيها رساله تتنقل بهدوء من شاطيء لشاطيء




انا اشتركت في عرض كنترول 25 تبع شركه فودافون ده بيديك 1000 دقيقه لارقام فودافون و 60 دقيقه لبقية الناس ومفيش رسايل .
في الغالب الشهر بيخلص وبتلاقي انك مخلصتش دقايق الفودافون ودقايق الغير فودافون خلصت بعد اول اسبوع  ، في الحالات اللي زي ديه لما بتزنق وعايز ابلغ حد مش فودافون حاجه ضروريه بعمل الاتي :

·       بكتب اللي عايزه اقوله في ورقه A4  بيضا .

·      بجيب ازازه شفافه معلهاش اي استيكرات او الوان وانشفها من جوه كويس وشرط ان تكون الازازه رقبتها ضيقه .

·      املي الازازه دي برمله صفرا او زلط صغير لارتفاع 3 سم




·      بحط الورقه ال A4 جوه الازازه وبجيب فلة بتاعت ازازه نبيت قديمه واقيفها علي مقاس فتحه الازازه واسدها بيها واروح لافف سكوتش حوالين الفتحه اللي مقفوله بالفلة كذا لفه علشان متسربش اي حاجه للورقه .


·      بروح لحد شاطيء سيدي بشر 2 قدام المحروسه كده واروح رامي الازازه في الميه في مكان بعيد عن الصخر
في الغالب الازازه بتوصل للحد اللي انا عايز ابلغه الرساله لانه غالبا بيكون واقف يشم هوا علي البحر في كيلوباترا او الشاطبي .





في صديقه ليا بتشتغل مصوره سينمائيه كتبت ال C.V.  بتاعها في ورقه وحطيته في ازازه ورميتها في البحر وبعد اسبوع جالها جواب من بلطيم من واحد بيقولها انه لاقي الازازه بتاعتها وطلب منها انها تبعتله  صور ومجلات وكتب عن السينما  ،  صديقتي استجابت وبعتتله اللي هو طلبه  ، بعد شهرين جالها جواب من الراجل بتاع بلطيم بيقولها ان الحاجه اللي هي بعتتها كانت هايله وهو قراها كذا مره وذاكرها كويس جدا وقرر ان يعمل ورشه سينما في بلطيم . 

Sunday, September 9, 2012

نادي المعلمين




(1)

هو كان بيشتغل في ورشه الخراطه بتاعت ابوه وبياخد يوميه 30 جنيه مربي شعر راسه اللي فوق القفا مباشره و بيحب يشرب ستيلا عند صاحبه في جراج في سابا باشا علي البحر وهو بيسمع اغاني حميد الشاعري اللي كان بيحضر كل حفلاته وبيشتري كل شرايطه  ،  مرافق مدرسه مطلقه من شودس  ، نزيه وبيحب ياكل كبده من عند ابو غريب  ويشرب زبادي خلاط علي قهوه وادي النيل قدام سينما راديو  ، هو اللي اقنعني اني اخش صنايع بدل ثانوي عام وخلاني البس سلسله فضه وخرجني مع بت من دوري كانت ساكنه جنب الورشه اللي شغال فيها واداني يومها 20 جنيه علشان اتفسح انا وهي J
كان ليه طقس اسبوعي انه كل يوم حد ( اجازته الاسبوعيه ) يروح مع صاحبته المدرسه المطلقه نادي المعلمين ياكلو جيلاتي في الشتا او ينزلو البحر في الصيف ،  لما عرف اني سمعت كلامه ودخلت صنايع بدل ثانوي عام فرح جدا وجابلي شريط حميد الاخير( كواحل ) وعزمني انا وصاحبتي والمدرسه علي جيلاتي في نادي المعلمين .




**********

(2)

وانا صغير مكنتش باكل غير من ايد امي ولما كنت اروح ابات عند عمتي  في الصيف كنت اقضيها نواشف علشان طبيخ عمتي مبيعجبنيش لحد لما في مره عمتي راحت مشوار الصبح وسابتني عند ام غريب جارتها اللي اكلت عندها طبيخ اول مره بره بيت امي ، ام غريب عندها طبعا غريب ابنها الكبير مدرس صنايع في مدرسه محمد علي الفنيه المتقدمه وعندها ولدين وبنت تقريبا من دوري ، من بعد لما عجبني طبيخ ام غريب تقريبا بقيت بقضي الصيف عندهم بدل ما اقعد عند عمتي ، غريب كان عامل كارنيه نادي المعلمين لامه علشان تودي اخواته الصغيرين البحر ، كانو بيروحو يوم اه ويوم لأ وكنت بروح معاهم وبحب سندوتشات العيش الفينو اللي محشيه كفته وبطاطس اللي كانت بتعملهالنا ام غريب  ، اختهم اسمها غاليه كانت مضفره شعرها وعينيها عسلي وكانت بتحب تسمع مني اغاني حسن الصغير وبتحب تلاعبني كريزي 8   ، اول امبارح وقعت في ايدي صوره ليا ولام غريب وعيالها التلاته واحنا واقفين علي شاطي نادي المعلمين وانا حاطط ايدي علي كتف غاليه وفي ايدي ساندوتش فينو غالبا فيه كفته علي بطاطس ساعتها بس اكتشفت ان ام غريب مش قريبتي اصلا وان عيالها لو شافو الصوره حيستغربو  ويقولو مين الولد ده اللي متصور معانا في نادي المعلمين .



**********

(3)

كان دايما في بيت العيله فيه صباح الاخت الكبيره اللي متجوزتش اللي كانت بتساعد خالتي في الغسيل وفي الاكل ودايما كانو اخواتها البنات الاصغر منها احلي منها ، انا وولاد خالي كلهم بنتجمع في بيت العيله علشان نشوف بنات خالاتي نزبط خروجه لانطونيادس او المعموره بس دايما صباح كانت بتصر تودينا نادي المعلمين علي الكارنيه بتاع امي  وكنا بنوافق علشان منجرحش احساسها كامراه تعدت الثلاثين بدون محاوله خطوبه  ، اتذكر ان بنات خالاتي مكنوش بيلبسو حجاب لما نيجي عندهم وقشطه انهم يقعدو بالجلاليب المكشوفه معانا نلعب الشايب ونسمع شريط سوسنه في البلكونه ، كان فيه احتكاكات غير بريئه طول الوقت سواء في البلكونه او في انطونيادس او حتي في نادي المعلمين وكان في غض طرف عن ده من كل افراد الاسره ( محدش كان قامط في التسعينات ) .
امي جابت عريس لصباح مدرس شغال مع امي في المدرسه لسه منقول من كفر الدوار مبقالوش شهر ، امي قررت ان نادي المعلمين يكون مكان اللقاء الاول ، بحيث ننزل البحر وهو يشوفها وهي بالشورت الاستريتش الاسود الشهير وفانله سفن اب البيضا المرسوم عليها ( فيدو ديو ) المكسمه عليها ، طبعا لما شافها عجبته وعزمها علي سفن في كافيتيرا النادي ، تقريبا امي شافته وهو بيخطف بوسه مشبك من صباح بس طنشت J
دلوقتي صباح عندها ولدين واي عريس بيجي لاخواتها البنات بتخليه يقابلهم الاول في نادي المعلمين .




Friday, August 31, 2012

بنزايون





دايما شركات القطاع العام اللي في المدن الساحليه بتعاني ازمه المصيف لان الشركات القابضه اللي الشركات الساحليه دي تابعه ليها بتشوف ان العاملين بشركات المدن الساحليه ملهمش حق في المصيف لان البحر جنب البيت اساسا والمفروض ان دعم المصايف يروح للعاملين بشركات في مدن داخليه غير ساحليه .

*********

شركه بنزايون المصيف الرئيسي ليها في بلطيم وهو مخصص للعاملين بفروع الشركه في المدن اللي مفيهاش بحر وانا كموظف في بنزايون المنشيه عمري ما طلعت مصيف تبع شركتي قبل كده ابدا ، مش شرط علشان انت ساكن قريب من البحر انك مش بتحتاج لمصيف لان طقس المصيف اساسا بيختلف عن طقس رحلات اليوم الواحد خالص ومقدرش استبدل متعه دي بدي وبالتالي كان قراري اللي اتخذته بعد 10 سنوات عمل في فرع المنشيه اني اقدم طلب للنقابه الخاصه بالعاملين بالشركه بادراج فروع الاسكندريه لشركه بنزايون في كشوف الفروع التي يحق لها المصيف .
فكري مدير الفرع اللي انا كنت شغال فيه بيشتغل زي الحمار فترتين في اليوم وهو مش بتاع بحر اساسا وبالتالي لما سمع عن الطلب اللي انا قدمته زعل وقالي واحنا فاضيين للهجص ده منت عندك يوم الحد اجازه ابقي روح فيه البحر وانبسط .
اللجنه اللي جت من النقابه علشان تبحث الشكوي بتاعتي كانت مستغربه من طلبي جدا وقالولي ان الناس في الاداره في القاهره مش موافقيين علي طلبك بس هما كان عندهم اقتراح ظريف ممكن يكون حل وسط يرضي جميع الاطراف .

النقابه قررت تشتري مجموعه من الشماسي وكراسي البحر وتوزعهم علي فروع الشركه المختلفه والعاملين ممكن يبقو يستعيرو منها لما يحبو يروحو البحر J

فكري هو مدير الفرع الوحيد اللي وافق علي الاقتراح ده واخد الشماسي والكراسي وخلاني المسئول عن الاستعاره لباقي العمال بصفتي صاحب اقتراح المصيف ومقدم الطلب الاساسي وبقي بيطلعلي زياده 40 % في الحوافز في 3 شهور الصيف

بلطيم اساسا مش مصيف كويس ومدام انت علي مدينه ساحليه يبقي مفيش داعي للمصيف  ، يوم اجازتك اصحي بدري وخد الشمسيه والكراسي وروح البحر





Saturday, July 21, 2012

دشت






اهم مكان في شركه الورق هو الساحه اللي قدام العجانات اللي بيتحط فيها الدشت ويبتدي يتفرط علشان يطلع علي سير ويترمي في العجان علشان يتعجن .

انت بتلاقي جنيهات فضه وورق بفره وعلب سجاير كامله وعلب بلاستيك وكتب !!!





لما بيكون فيه شحنه مصاحف متهالكه او غير منقحه بتيجي علشان تتحط في العجان وهنا اللي بيبقي واقف علي السير لازم طول الوقت يبقي دايس علي المصاحف وبينزل عرقه عليها وساعات كمان بيتف بدون الكثير من التركيز وتأنيب الضمير .





البحريه لما بتضبط شحنه مجلات سكس ( موضه قديمه فشخ ) بتجيبها شركات الورق التابعه للقطاع العام تحت حراسه مشدده وبتحرص انها تتحط في العجانات مباشره بدون اي تاخير او تشوين تجنبا للسرقات  ، من اللحظات الممتعه  اثناء العمل انك تشوف الطرق اللي بيتبعها عمال سير العجانات علشان يهربو كرتونه او اتنين من تحت ايد حراسات الجيش للاستخدام الشخصي لاحقا او حتي للبيع .


الصور للعزيز شكري مناع

Friday, June 15, 2012

العامه للورق






اللي لاحظتو في الجماعه بتوع كفر الدوار انهم بياكلو في النهار علي مرتين مرة الصبح ومرة بعد صلاه الضهر قبل العدا بتلات ساعات و بيلبسو بنطلونات قماش من اللي حجرها واسع علشان تبقي مهويه علي البضان طول الوقت وبينتعلو شبشب جلد مفتح من كل الجوانب بيبقي مهوي علي رجلهم وسهل انك تخلعه لما تتوضي لصلاه الضحي او صلاه الضهر وسهل انك تخلعه برده لما تحب تنضف بين صوابعك  وتطلع الفتايل السودا وانت بتتجاذب اطراف الحديث مع زميل اخر من كفر الدوار وبيفضلو  ان ساعات اليد  تكون واسعه علشان طول الوقت يهزو في ايديهم علشان ينزلو الساعه من الساعد لحد الرسغ .
الاسباب اللي فاتت دي بتدي مؤشر عن هما ليه بتكون اعضائهم مرتاحه ، مستكينه ، مفيهاش اعوجاج وبيعيشو لفترات طويله .
الاريحيه اللي في الحياه دي خليتهم يبقو مكسلين ينطقو الكلام كامل يعني مثلا بيقولو علي رمضان " رمضا " او علي جبريل " جبرَ " او بمعني اخر ان اخر حرف بيتحذف خصوصا لو قبليه حرف متحرك .




العامه لصناعه الورق كانت ومازالت اكبر مجمع لصناعه الورق في افريقيا والشرق الاوسط من حيث المساحه فقط ( 166 ) فدان ،  في منطقه الطابيه علي طريق الاسكندريه - رشيد . تأسست علي يد عبد الناصر 1957 بتكنولوجيا المانيه وبمساهمه يابانيه .



الغالبيه اللي اشتغلت في الشركه كانت من كفر الدوار ومراكز اخري قريبه من الطابيه وكان دايما فخر الشركه في الوقت ده انهم بيصنعو ورق كتابه ابيض وبالتالي كان بيضطر قاطني كفر الدوار من العاملين في الشركه تكرار كلمه ورق كتابه من باب التفاخر علي زملائهم من العاملين في صباغه البيضا او كفر الدوار للغزل . 

سياسه الحذف والتخفيف والتفخيد لعبت دور محوري في استحلاب اسم جديد ببشركه عرفت به فيما بعد واصبح رمز لصناعه الورق مش بس في مصر ولكن في شمال افريقيا كله  ، ركز معايا

                                                ورق كتابة

                                                  ورأ كتابة

                                                   ورأكتا 

                                                    راكتا 



بقي الاسم الرسمي للشركه بعد كده هو  "راكتا "  وظهرت شركات ورق تانيه انتحلت نفس الاسم زي  "كارتا " في مدينه اكتوبر الصناعيه وزي شركه  " فارتا " اللي بقت بتاعت بطاريات عربيات بعد كده

  • اي حد دلوقتي لو قولتله العامه لصناعه الورق مش حيعرف انت بتتكلم عن ايه انما لو قولتله راكتا حيبتسم ويقولك " ياه مش دي اللي في الطابيه ، هي لسه متخصخصتش لحد دلوقتي ؟؟ " 





Sunday, June 3, 2012

حكمه المحكمه






احمد رفعت ظرف مبارك 25 سنه سجن مش علشان هو قتل المتظاهرين لأ  ابسلوتلي انما علشان هو ممنعش قتل المتظاهرين يعني علشان هوهلهل او هتيا او بمعني ادق خول

 يعني احمد رفعت كل اللي عمله انه عمل شير لحكم الشعب واكد علي ان حسني مبارك خول بس كده

Thursday, May 10, 2012

أليا





- كنت تقفين علي الجسر المخطط وكنت اقول لك : " أليا " فتمشين علي الحبل لملاقاتي . وكنت انتظرك في الوسط عاليا فوق الجمهور . ثم احني ركبتي واقول لك : " أليا "  وكنت انت تقفين علي ركبتي ثم تصعدين الي كتفي . هل كنت تخافين انذاك؟

- كلا ، فقد كنت تقول لي " أليا " وهذا كان يعني انه يجب ان اكون هادئه ولا داعي للخوف .

- حسنا ! الان اقول لك " أليا "لتباعدي بين فخذيك وتغمضي عينيك وتصبحي دميتي

- سأصبح دميتك


من كتاب الفخذ للكاتب محمد منير



Tuesday, April 3, 2012

كِن باتلر





لم تكن المفاجأة في زيارة منزل "كِن باتلر" - الموسيقار التجريبي الأمريكي – في حي بروكلين بنيويورك ، في معرفة أنه يصنع آلالاته الموسيقية بيديه، ولا في رؤية المطارق والفؤوس وبنادق الصيد وجذوع الأشجار التي ركب عليها الأوتار ثم وصلها بالكهرباء لتتحول من آلات قتل و تخريب وقطع صماء إلى آلات موسيقية كهربائية يعزف عليها ألحانه التجريبية، ولم تكن المفاجأة في اكتشاف النغمات والايقاعات الشرقية وهي تتسلل إلى موسيقاه الساحرة عبر هذه الآلات عندما استمعنا إلى مقطوعات موسيقية يعزفها في حفلات في جميع انحاء العالم. كانت المفاجأة عندما سألته إذا كان قد استمع إلى الموسيقى النوبية من قبل، ليجاوبني بتلقائية أن موسيقى الفنان حمزة علاء الدين هو من ولى وجهه شطر الموسيقى الشرقية. فبعد استماعه إلى موسيقى حمزة في إحدى حفلاته، ولقاؤه به شخصيا فيما بعد، اهتم "كِن باتلر" بدراسة المراجع الموسيقية التي رشحها له حمزة علاء الدين في الموسيقى النوبية والموسيقى الشرقية. صنع بعدها "باتلر" دفوفا من الزجاج والألواح الخشبية و ألف قطعا موسيقية مستوحاة من موسيقى أغاني أم كلثوم و الايقاعات الأفريقية، لم نملك عندما استمعنا إلى إحداها إلا أن نتمايل ونتراقص و نصفق بكل قوة وكأننا في حفلة موسيقية حية، لم نفق من هذا الحلم إلا على استضافته الكريمة لنا في منزله المتواضع في بروكلين الذي يسكن في قلبه إحدى بصمات حمزة علاء الدين .

 هاني مصطفي


موقع كن باتلر 

Friday, March 23, 2012

بحار


سمعنا " بحر أبو جريشه " المقاتل البورسعيدي الصول في قوات البحريه( التي
أعادت لمصر الضفة الشرقية) الذي قررأن يغادر المراكب للغناء والمواويل ..
كان صوته عاتياً وخشناً ولكن فيه حنان ..


حكى لي إسكندراني عاصر " بحر أبوجريشه " أن الرجل كان أسطورة طاغيه :
" ده كان بينزل من المركب كل كام شهر ويدخل علينا من المينا ,
طول إيه في عرض إيه , ويمشي من المينا لحد ما يدخل حواري (باكوس ) وهو بيغني .. النسوان بتفتح الشبابيك وتبص له , الله يرحمو كان بلطجي تمام , ما فيش فيكي يا سكندريه صوت زي صوته , وتلاقيه إيه .. طول ما هو ماشي بيشرب في بيره ومخدرات
لحد ما يوصل الفرح اللي هيغني فيه .. يطلع على الطرابيزه بتاعت المسرح وهو بيغني وبيرقص و وراه مليون عازف إيقاع جايين من كل البلد من بحري لحد أبوقير , ويبتدي الله يرحمو بقى , يفكفك زراير الأقميص الأبيض بتاع البحريه شويه شويه لحد ما يرميه في الفضا ويفضل بالبنطلون الأبيض والفانله التحتانيه لامؤاخذه !! ويروح مطلع من جيبو منديل أحمر
ومشوح بيه في الهوا ورابطو حول رقبتو ..
زي الجماعه بتوع أمريكا اللاتينيه بالظبط ! الناس كانت بتغيب معاه وبتفرح وبرقص جامد
  ... "(!!)


طلال عفيفي

Friday, March 16, 2012

بادليو شيرزمان





انا مقتنع ان مرشح الرئاسه علشان يكسب في اسكندريه لازم حملته الدعائيه تشتمل علي حاجات اساسيه ححاول اسردها بترتيب ما :

  •        ان مؤتمره الجماهيري الاول يكون في سيدي بشر عن الحي او في المندره عند الكوبري
  •       ان بوستراته  تبقي موجوده علي مدخل سنتر "الجزار" وعلي  ضهر مذكرات النحو بتاعة "الانصاري"
  •       ان يكون فاهم كويس ان من اهم دعائم برنامجه الانتخابي ان يحافظ علي مشروع عصافره – بحري ب 1.25

"محمد بادليو شيرز مان" مرشح العصافره وابو خروف للرياسه في دماغه كل الكلام ده واكتر بس هو محتاج دعم اهالي الثغر في الحمله الانتخابيه خاصه اهالي شارع العاشر ومدينه بنك فيصل .

محمد بادليو اذهلني ان ملف المحلات اللي كان الجيش ازالها من علي سور السكه الحديد في رمضان اللي فات واللي رجعت اتبنت تاني بقالها شهر ونص بس تحت رعايه المنطقه الشماليه وحي المنتزه هي العمود الفقري للجانب الاقتصادي من برنامجه





دلوقتي بقت في شركه هي المسئوله عن كل الاراضي الفاضيه المحيطه بشريط السكه الحديد في اسكندريه ( بعد عمل مناقصه عادله ) ، بتأجر المتر من  "سكك حديد مصر" بألف جنيه في السنه في سبيل انها تعمل محلات حد ادني في المساحه 100 متر مربع بمقايسه كهربا ومياه واحده لكل محل ، طبعا الشركه عملت المحلات كلها زي بعض بمساحات ثابته 25 متر مربع وبتأجر المحل شهريا ب 1000 جنيه وطبعا بتعمل مفايسه كهربا ومياه لكل محل بس بالحب والتراضي مع المصلحتين .
بادليو قرر ان الشركه الوسيطه دي لازم تتناك وانه حابب انها تبقي شركه قابضه وتأجر المحلات مباشره وبمساحات صغيره ، المحل يشيل اتنين عمال في الشفت يبقي اربعه في اليوم ولو اتبني حوالي 1000 محل في سيدي بشر والعصافره بس لوحده يبقي كده هو نجح في خلق 4000 فرصه عمل لسيدي بشر والعصافره .
هو بس بيحب يناشد الناس من خلال البنيكه بخصوص موضوع التوكيلات علشان يقدر انه يضم علي سباق الرئاسه الرسمي وده بعد تخلي عضوي مجلس الشعب " البدري فرغلي " و " ابو العز الحريري"  عن توفير اصوات 30 نائب برلماني لدهم ترشيح محمد بادليو ، طبعا ابو العز طمع هو في الرياسه والبدري فرغلي ملطوط في احداث بورسعيد .


جريده الكل برئاسه تامر صلاح الدين تنشر تقرير عن مرشح العصافره



للتواصل مع مرشح الرئاسه المحتمل او لتقديم الدعم
01224695868
01005503157

Wednesday, March 14, 2012

احرموني ولا تحرموني








كنت وانا صغيرة دائما اسمع امي تردد هذه الاغنية وهي تطبخ او هي تخيط لي زراير قمصاني كنت اجلس تحت قدمها كي استمد دفأ من اشعة الشمس المتسللة من الشباك الذي يحازينا وكي اسمعها وهي تشدو بهذه الاغنية الجميلة التي طالما عجبتني منذ طفولتي حتى لم اكن افهم ولا سطر منها لكن اداء امي بنبرتها المليئة بالشجن جعلتني احبها جدا وهي اغنية " احرموني ولا تحرموني " احد اغاني الحقيبة السودانية الشهيرة من كلمات الشاعر العظيم  "ود الرضي " وتغنى بها العديد من المطربين حيث ان اغاني الحقيبة ليس لها مطرب بعينه ولكن دعنا نقول من اول من غناها هو "حسن عطية" , انا سمعتها من كثيرين ولكن لم اعثر على اداء يعجبني سوى من سيف الجامعة, وشاعر الاغنية ود الرضي اهم من اثروا في اغاني الحقيبة لاسلوبه الغني واستعماله المبهر للقوافي وتلاعبه بالالفاظ  فهو شاعر يمتلك ادواته بحرفية بالغة حب اللغة العربية منذ طفولته حيث تعلم في مدارس قرآنية عدة وحفظ القرآن واجاد نظم الشعر منذ صغره وهو ينتسب لعائلة علي بن ابي طالب لانه احد احفاد على زين العابدين بن الحسين .ونظم شاعرنا قصيتنا التي سنتحدث عنها احرموني ولا تحرموني عندما مر على حبيبته ولم تبادله السلام ولا تلقيه تحية فقال لها:


احرموني ولا تحرموني
سنة الاسلام السلام
عطفكم يا من الموني
كالاشعة الاسهم رموني
الشجون بالليل نادموني
الانين والنوح علموني
لو معنعن قول كلموني
حبي طاهر لم تظلموني
برضي قابل الظلم احترام

يا النفوني كفى اعرفوني
ساهي ساهر ساحات جفوني
في هواكم يا من جفوني
لا الوم ان لم تنصفوني
انعكاس الاحوال كفوني
ايضا الايام عرفوني
يوم سموما ويوما غمام

كلما النسمات عطروني
فاجأوني دموع مطروني
رب اغفر للعكروني
في وداعة الباري العروني
رب وقت يتذكروني
او يقول القايل دروني
او يحدث عني المنام

الدهاة بالسلو ما دهوني
عن تجاهكم ما وجهوني
بي تحكو وشمتو النهوني
وبرضي هايم وخاضع لهوني
لا اقول مستنكف دهوني
عن كثير عن قيس نبهوني
عن حقيقة الحب غين ولام

ما تنفس صبح او ضحى لي
الا غاب هدهد فكري ورحالي
قال قربك عين المحال
قلبي غير زكراك ما صحى لي
يكفي ان السهد اكتحالي
يكفي شاهد لي انتحالي
شاكي شاكر شاخص دوام

طاف خيالك والليل كافر
شفت بدرو المتجلي سافر
صك غاضب لقى دمعي دافر
قاللي جملة وعقد الاظافر
قاللي طبع الريم اصلو نافر
قلت عل تريم النوافر
وعل راء الريم تبقى لام

في التفكر اصبح وامسي
ايضا التزكار نجوى همسي
وحياتي اشبه برمسي
اشكو يومي واسترحم امسي
ما عهدتك يا ليل تمسي
طلت وامتى اشراق شمسي
وانت وين يا بدر التمام

قتلو ليت الايام يندن
تبقى لانت وسحابا دندن
بلماك النيران يخمدن
ليك روحي واجزيك حمدا
قال لي كيف تستوجب لي حمدا
من تعاطى المكروه عمدا
غير شك يتعاطى الحرام




ويبدا القصيدة ود الرضي باحرموني ولا تحرموني سنة الاسلام السلام اي احرموني من اي شيء الا السلام فهو سنة في ديننا,

ومن الكلمات التي اعجبتني بشدة عندما فهمت معناها عندما قال : قلت عل تريم النوافر اي علك تصبح اكثر تفهما وتلاعب في الالفاظ بقوله عل راء الريم تبقى لام اي ليم والليم يعني الصلح او الوصال 

, ايضا في قوله لو معنعن العنعنة في الحيث اي منقول عن فلان ومنقول عن فلان اي لو احد نقل لك كلاما اخبرني

,وفي البيت الذي يقول فيه ايضا الايام عرفوني يوم سموم ويو غمام اي ان الايام دول يوم لك ويوم عليك يوم سموم فيه رياح ويوم غمام ويوم ممطر

, يسامح الشاعر حبيبته مهما اقترفت قال لها في وداعة الباري العروني اي ان يحفظه الله من اي مكروه مهما فعل به,

ولان ود الرضي كان مولع بشعراء البادية اتى لنا مستشهدا بمنون الحب الاكثر شهرة قيس عندما قال عن قيس كثير نبهوني عن حقيقة الحب غين ولام الغين عائدة على غل الغرام ولوعتها واللام للتقيد به , وقد استشهد ايضا باهم الحيوانات التي ذكرت في القرآن وهذا يرجع لتعاليمه القرانية عندما ذكر الهدهد وقال الا غاب هدهد فكري ورحالي قال قربك عين المحال  كهدهد  سليمان ولكن هدهد الشاعر عاد له بخبر مفجع حينما قال له قربك من الحبيب امر محال, ذا شرح لبعض الابيات التي استطعت افهمه وابحث عن معانيها في كل مكان منذ ان وقعت في غرام هذه الاغنية الرائعة.


اغاني الحقيبة فهي الاغاني التراثية السودانية وكانوا معظم شعرائها من حفظة القرآن وممن يعشقوا اللغة العربية والشعر الجاهلي وشعر البادية ابرزهم هو ود الرضي كاتب قصيدتنا وخليل فرح وابو صلاح وعمر البنا وكثيرون اخرون, ويرجع اسم اغاني الحقيبة لطريقة التسجيل القديمة على اسطوانات غير ليزرية الاسطوانات القديمة التي كانت تحفظ داخل حقيبة ومن هنا انتى اسم حقيبة ومعظم الاغاني التي يتغنى بها الشباب الان هي من تراث اغاني الحقيبة كاغاني الموسيقى العربية مثلا عندنا في مصر.


يسرا عبد اللطيف

Sunday, March 11, 2012

اللامنتمي





جماعة السلف مبتدعة ،وصاحبة اختلاف بشق العقيدة والعقائد المتفق عليها ،فبأجتهادهم المفسد بتقسيم الايمان الى الالوهية والربوبية والاسماء والوصف فيه خروج عن الملة ،الذى اوصلهم لعبادة الحاكم وان ظلم ، واللة لايحب الظالمين والظالم لاطاعة له كما الفاجر  ،فان حكم بما امر به الله ، خلع عنه الظلم والفجور ، والحاكم العادل الذى لا يكفر الصادق الامين 
 والله اعلم

العلامه  المحدث عادل بن النحاس

Monday, February 27, 2012

ساحر خورشيد




اول مره اشوف "طوني" كانت لما اشتغلت في شركه النيل للمفروشات ، كان هو المهندس المسئول عن قسم "الجكر" .
طوني مهندس من مانشستر كان شغال في مصر من 3 سنين وكان لسه معلن اسلامه من 8 شهور وبقي اسمه " ابو احمد " .

كان طول الوقت في المصنع بيعمل العاب سحريه للعمال اللي شغاله معاه في القسم ، من اول ما اشتغلت في الشركه وطوني حاببني وعلطول بيصرفلي مكافأت ، أنا حبيت اعمل معاه واجب وعزمته علي الغدا عندنا في البيت وهو قبل ( احنا عندنا بيت 3 ادوار في خورشيد ابويا اساسا من اوائل الناس اللي راحت خورشيد ، هو فاتح محل تموين وواخد الارض اللي عليها بيتنا دي يجي من 40 سنه

لما طوني وصل خورشيد طلعته الدور التاني علشان يبقي رايق ويعرف يقعد ويتغدي براحته ، افتكر انه في الفتره دي انا كنت قاري فاتحه علي "رحاب" جارتنا بعد عركه رب السما مع ابويا ، هو مكنش موافق علشان امها ، انا عارف ان امها ست شايفه نفسها شويه وكل لبسها بنطلونات استرتيتش وباديهات من تحت التونيك وعارف انها اطلقت من جوزها علشان كان كابس علي نفسها وراحت اتجوزت واحد تاني " هلهل" بس هي الصراحه ست جدعه عمرها ما سابت بناتها . اهي "رحاب" بقي دي شبه هيفاء وهبي بس علي افتح وليها اختها  "ليلي"  بيضا برده وحلوه ورقبتها شبه رقبه "ورده" ،هي مطلقه وطلعت بقرشين من طليقها شاركت بيهم واحد في سنترال في "الزوايده" ، طوني وهو كان بيتغدي سمعت حس "ليلي" عندنا تحت ، اصل هي العشم كان  " نايكها"  وبتيجي تقعد مع امي شويه قبل ما تروح السنترال ، هي طبعا عارفه "طوني" لاني في مره روحت السنترال كلمته  من هناك علشان مكنتش لسه اشتريت موبايل وهي سمعتني وانا بتكلم انجليزي وبتاع وسالتني وعرفت القصه ، طبعا هي لما لقيتني بتغدي فوق وامي مرتبه البيت وبتاع خمنت ان "طوني" ممكن يكون معزوم عندنا راحت طالعه فوق قال ايه علشان تسلم عليا وانا قاطع انها عايزه تشوف طوني ، طوني كبير في السن 52 سنه بس صحته حلوه والبنش بتاعه فظيع  وكان حريف اوي في الكوره وسباح ماهر ( بيقولك ان كل الرجاله في مانشستر بالمنظر ده )، هو برده مطلق مراته زي "ليلي" ، انا اتحرجت من "ليلي" فعزمت عليها تقعد تتغدي معانا قامت قبلت وقعدت وسيطرت بالطريقه  ، طبعا طوني بعد لما روح اتصل بيا وقالي انه " ليلي " .

"طوني" ساعدني علشان اعمل الخطوبه وسلفني ألف جني من معاه ، هو مكنش حيحضر الفرح لانه طالع اجازته السنويه بس لما لقي ان اد ايه انا حتضايق لو هو محضرش اجل السفر وقال لصاحب المصنع ان في شويه مشاكل في مكن "الجكر" وانه حيأجل سفره لحد لما يظبط الدنيا ، ساعتها هو كلمني وقالي انه حيقضي معايا 

One week , one day , one hour

انا بقي ساعتها مفهمتش هو يقصد ايه بس بعد كده عرفت انه يقصد انه حيقضي معايا اسبوع في المصنع وحيقضي معايا اليوم اللي قبل الخطوبه كله في خورشيد علشان يساعدني تجهيزات الخطوبه وانه حيقضي معايا ليله الخطوبه ساعه واحده بس وبعد كده حيسيبني علشان يلحق الطياره بتاعته ، كان ساحر فعلا .
يوم الخطوبه لما حضر جابلي معاه البوم صور هديه وقالي متفتحوش غير بعد الخطوبه ، اليوم ده هو انبسط ورقص وكان مبسوط اوي من " أحمد شيبه" اصل انا جيبته في الخطوبه ، تاني يوم اتصل بيا من مانشستر وقالي افتح الالبوم فتحته لقيته حاطط مكان كل صوره ورقه بميه  ، قالي علشان لما ابقي اخرج اتفسح مع "رحاب" اعرف اصرف واقعد بقي براحتي علي "ديليس" واكل جاتوه وانبسط انا وهي ، مش بقولك ساحر .

انا سيبت "رحاب" واتجوزت واحده تانيه جارتنا برده من خورشيد وعندي دلوقتي " ريماس" و "طوني" رفض يتجوز "ليلي" لانها طلبت منه شقه علي البحر في "المندره" وعربيه " ماروتي " وانا قولتله ان ده كتير علي اي واحده من خورشيد وهو سمع كلامي ، "طوني" قضي 7 سنين في مصر وبعد كده رجع مانشستر ، هو حاول انه ياخدني معاه بس انا رفضت مهو مش معقول اسيب " ريماس " ومكن "الجكر" واسافر



Galbi el Atouf by haitham_shater