Monday, March 30, 2009

ذكريات العيش الطباقي



كالعاده نوستالجيا التسعينات الموضوع الذي قتل بحثا وكتابه وسبوبه بس دايما في اهمال لجزء كبير من الذكريات دي

ولا يمكن علشان اختلاف الذكريات فقط بس انا كل اللي اعرفهم مروا بالمرحله دي

انك تقوم الصبح تشتري عيش من اي فرن جنبك وما يصاحبها من استعدادات

1 السلبس بتاع باتا كان ايامها ب 8 جنيه وكان ظهر ليه بديل كنتره زرقا كانت في باكوس ب 4 جنيه وتروح عند الاسكافي ياخدهالك لفتين قبل ما تلبسها لزوم المتانه

2 تشيرت الاهلي الاحمر اللي عليه اعلان كوكاكولا

3 الشبكه بتاعه العيش لزوم حمل العيش والعراك

4 باكو بسكوت لزوم الفطار في حاله التاخر في الفرن

تقابل ناس راجعه من الفرن ومعاها عيش(سبحان الله) وتسال الواحد منهم السؤال الخالد (هو الفرن زحمه) فيجيب بالاجابه الخالده(موت) وعلي شفتيه ابتسامه متشفيه وبعدين نيجي للفرن ذاته كان طابورين حريمي ورجالي وكل واحد يتقسم لطابور خمسات وطابور للباقي (قبل ظهور طابور البوابين وحوارات الشراعات)

ثم جأت سنوات الطباقي السعيده

وكان في خلاف هل طباقي لانه طبقتين ولا طباقي لانه كبر وبقي قد الطبق واحتدم الخلاف واستقررنا اخيرا علي تفسير الطبق لانه كان قبل كده طبقتين.

كان في كشك جنب اي فرن هو المتولي مسئوليه التوزيع( الشراعه تطلع من الفرن تروح للكشك وانت تاخد من الكشك)

وكان (علي حريم) هي اللي بتبيع حاجه كده زي التجنيد بالنسبه للحريم(خدمه مجتمعيه) وده يفسر ليه اختفاء حركات زي كلنا ليلي وانا انثي في التسعينات لان

اولا الحريم كانو في الكشك اغلب النهار وبيرجعو هالكانين فمفيش وقت تعمل بلوجات وبانرات.

ثانيا مكنش حد بيقدر يتحرش لانه لو اتحرش تاني يوم مفيش عيش وحيطلع طايلامانه لحد ما يروح فرن تاني ويسستم نفسه

بالنسبه للوقت يتوقف علي بتجيب بكام ومعاك حد ولا لأ

واليكم التفاصيل:


5 ارغفه

10 ارغفه

20 رغيف

فرد

ساعه

3 ساعات

3 ساعات

فردين

ساعه

ساعه

3 ساعات

· ده في الصيف في اي يوم غير يوم الجمعه و في الفرن مش الكشك

· طبعا في حالات استثنائيه مثلا لو الشباب في الشارع رايحين البحر ومستعجلين علي الفطار فيروحو كلهم برت واحد(مع بعضهم يعني) وهات يا بضينه وجر شكل في الناس وياخدو اللي عايزينه في 10 دقايق تقريبا ولكن دي حالات موسميه

خلال ال 3 ساعات دول الحياه بتمشي ازاي

اول حاجه تشوف مين اخر واحد في الطابور وتقول انا وراك بصوت عالي يسمع كل من في الصف تستني لحد ماواحد يجي وراك وتقوله حروح اجيب حاجه واجي

قدامك 3 حلول :

1 اتاري وتلعب طيارات الساعه بجنيه بالدراع القديم ابو زرار احمر

2 تلعب بيل جنب الفرن مع اي حد بيجيب عيش زيك

3 تكون مربط علي حوار كوره بس الفوره مطولش عن 5 بحد اقصي علشان تروح تبص علي دورك في الفرن وتيجي تلعب الفوره الجديده لحد البصه الجايه

قبل ميجي دورك بنفرين ترجع تقف في الطابور بعد تذكره الناس بمكانك تفتح الشبكه للي قدامك علشان يحط فيها العيش واللي وراك يفتحلك الشبكه علشان انت تحط العيش ده عرف ومفيش حد بيخلفه والحياه ماشيه

طبعا كان في ناس بتاخد من جوه يعني متقفش في الطابور وزمان كانو حبايب صاحب الفرن فقط

دلوقتي الوضع اختلف تماما بعد ظهور البواب اغلب البيوت القديمه اتهدت واتبني بدالها عماير عاليه وكانك تمشي في وادي بين جبلين بقي اللي بيخش من جوه كالاتي :

1اي شيخ جامع

2 البنات اللي مرافقين العيال اللي شغاله في الفرن واغلبهم بنات (cover)

3 بعض البوابات الفلاحات البط لان صاحب الفرن بيحب يغازلهم

بجانب المعارف السابقين فيكون الانتظار في الخارج في بعض الاحيان توفير اكثر للوقت

اما في الخارج فهناك 3 طوابير واحد للبوابين وواحد للبلطجيه وواحد للكوركات اما الحريم فكتله واحده علي الشباك واللي يلحق ودايما طابور البلطجيه هو الملاصق لطابور الحريم لزوم الاحتكاك الذي ينال رضا الطرفين في كثير من الاحيان

دلوقتي الشرا بقي من البواب حتي لو مش بواب العماره اللي انت فيها

بيبقو معروفين وكل واحد واخدله شارع او شارعين

هو طبعا بيأفز علي الفرن من الساعه 6 ويجيب علي دفعتين دفعه ليه ودفعه للعماره اللي شغال فيها

حتلاقيه قاعد علي الباب وبيسمع الراديو في الموبايل الصيني ترحله وتقوله

فيه؟

اه

بكام

ال10 بجنيه

ماشي

طب استناني هنا ويتلفت حواليه ويقوم داخل ويطلع بالعشره في كيسه سودا وتروح ظارفه الجني.

للافران ادبيات كثيرا ما اهملت ربما لنظره طبقيه برجوازيه لأدب الافران

فذكر وليت الذكري تنفع المؤمنين

Friday, March 20, 2009

DANGEROUS MIND



بسرعه كده بقي الفيلم ده من الكلاسيكيات

كوليو والتسعينات السعيده




Monday, March 16, 2009

عندما تكون البوكر اسكندرانيه



مازال الاسكندراني معروف بقوته وبجبروته
برنس والله
ولا راح التكعيبه ولا شمها من بعيد
من الشاطبي للبيت ومن البيت للشاطبي
كله في المواني يابه
وعزازيل
تيت تيت
وحبيبكم مين
يوسف زيدان
بتحيو مين
يوسف زيدان
مربوحه

Sunday, March 15, 2009

حكمه اليوم


ده ربنا خلقها طماطم

تسبّكها انت
من ادبيات التكفير والهجره

Friday, March 13, 2009

محمد الاحمر او3.10 الي سيدي جابر



بيقولك محمد الاحمر صايع اسطوره في اسكندريه تسمع انه كاتب علي بيته(متخفش من

ربنا وخاف من محمد الاحمر)ميه وكيميا ونسوان محدش عارف يوقفه عند حده من اول

نقطه محمد فريد لحد قسم منتزه اول مرورا بنقطه الجلاء ليه معارف و افضال علي

الظباط والمخبرين وحتي الشيوخ اصله وقف معاهم في انتخابات 2005(مصطفي محمد

مصطفي رمز النخله)لحد مخبط مع مشويات بلبع والحاج بلبع نفسه طلب 2 فرخه مشويه

وطبق محشي دليفري ومحاسبش المشكله مش في الفلوس المشكله في هيبه بلبع نفسه قصاد

حسني وقريه عبد الوهاب والحل(القضاء علي محمد الاحمر تماما) بس مين حيقوم بالمهمه

دي داخل حي المنتزه مين من اول الصيع لحد الضباط .

يبقي الحل يتسحب بره المنتزه في قسم ولا نقطه و مفيش احسن من قسم باب شرق شرح

وبرح وخارج نطاق سيطره الاحمر بس ازاي حيخرج من المنتزه الواحد سمع انهم بعد

حادثه صاحب التوكتوك الشهيره اللي ولع فيها السواق في نفسه وهو مقيم في شارع 45


وكانن هناك لانه عارف انه مستحيل تحصل مناوشات معاه هناك فبعد احداث الكنيسه

والتوكتوك والامن بيحاسب اوي ومبيحبش المشاكل يبقي لازم متطوع يعمل الموضوع ده

واحد لا هومن الامن ولا هو من الصيع خلاص نشوفلنا واحد من العيال بتوع الجيم اللي

بينامو وبيتمرنوا وبس

المكان(بوشه جيم)

بلبع:ازيك يا بوشه

بوشه: ازيك يا معلم والله الواحد جاع علي السيره

بلبع:عنينا ليك يا بوشه بس كنت عايزك في خدمه

بوشه: امر

بلبع: كنت عايز عيل من عندك يكون عفي وفي نفس الوقت غلبان ملوش في سكه الاشكال

الوسخه

بوشه: والله مفيش احسن من حمو السكران واشار الي فتي اسمر طويل وعريض

يقترب المعلم من حمو الراقد علي المكبس وحاطط 60و60 من الناحيتين

المعلم: احسن يا وحش

حمو: شكرا يا كابتن

بلبع: كابتن وماله بقولك ايه كنت عايزك في مصلحه

حمو: خير

المعلم:خير ان شاء الله الاول قولي انت شغال ايه؟

حمو: مبيض محاره وبودي جارد بعد الضهر في الميراج علي البحر

تمام عز الطلب وقص عليه المعلم الحكايه

بس انا مليش في السكه دي يا معلم ومحمد الاحمر مش اي عيل سرس رفستين ونرميه في

التونايه(مشروع صغير) منتا ابو المفهوميه يا معلم

اسمع اولا انا حشغلك عندي في المحل ثانيا ليك علبتين امينو كل شهر

بس بشرط الامينو امريكاني وحساب الجيم عليك بس مش الجيم ده ممكن دراجون جيم

علشان ريحه العرق هنا فظيعه

ماشي استبينا

استبينا

علي بركه الله

المكان(شارع 45)

تعا عصافره بحري تعا عصافره بحري العربيه اللي قدام يا شنتل

لا والله انا كنت عايز اسال علي حاجه

امرني

عادل زنجيري

يلتفت السائف حوله حذرا وينتحي بحمو علي جنب

خير عايز شغل ولا حاجه

لا يا عم الله يحنن عليك انا كنت عايزه في موضوع كده

ضروري

اه والله

خلاص الساعه 6.30 علي مون لايت علي اول الشارع عارفها

اه

خلاص متتاخرش انت عارف زنجيري مواعيده فوق النمره واحد بقولك معاكش سجاير

متغلاش عليك علبه روزمان بحالها

الله يسهلك الحال تعا بحري تعا بحري

المكان(كافيتريا مون لايت)

سامو عليكم

مرحب يا صحبي

الاخ عادل

ان شاء الله

ازيك يا غالي انا اللي من طرف اسطي..

ايون ايون خير ان شاء الله

محمد الاحمر

يلعن يحرق يخرب يا ابن ال.. هو الكلام ده يتقال هنا قوم حصلني علي النفق علي البحر

عقبال ما حاسب واجيلك

حاسب وحصلني وبقينا علي البحر وحكيتله الحكايه

اديني يومين وحرن عليك معاك موبايل

اه

خلاص حر ن عليك بس اوعي تفتح كانسل واتصل انت

ولا يهمك

لزوم الاحتياط بس

اه منا عارف

طب بالسلامه انت دلوقتي

المكان(كافيتريا جلاكسي علي البحر)

باشا

اقعد يا حمو

بس ..

لا دي ساميه مننا وعلينا اتاخدي كده اختي شويه

بقولك ايه انا كلمت الناس وبصراحه الناس مقلقه زي مانت عارف ده محمد الاحمر وحبايبه

يامه

ده برده بلبع وحيحينكم كويس وانت كده كده ملكش دعوه انا اللي حتعامل بيس

بيس استاذنك بقي علشان دي قاعده عائليه تعالي يا ساميه

اهدي بس احنا متفقناش حندبرها ازاي

اه صحيح بص يا سيدي حنخلي بتوع التكاتك يعملو اعتصام حدادا علي روح الفقيد

المكلوم وحيقفلو شارع 45وبالتالي العيال الامن المركزي بتوع الراس السودا حييجو

ويدورو الضرب فيهم هنا اكيد حيظهر محمد الاحمر علشان ميصحش يحصل كده في

منطقته كده كانك بتشتمه بالام لما يظهر فانت منه له فاهم منه له

طب وحنسربه في ايه

بص انت تاخد مشروع عصافره سكه حديد من فوق وتطلع علي محطه قطر سيدي بشر

هناك فتركبه القطر تروح بيه سيدي جابر وتنزل تاخد تاكسي لباب شرق

طب مهم ممكن يحصلونا علي المحطه في سيدي بشر

متخافش هناك في نقطه شرطه واحنا حنكون في عز الضهر فحتي لو محمد يعرف ناس

منهم مش حيقدرو يعملو حاجه حناخد احتياطتنا

ازاي

اولاانت حتكون مثبت محمد من جانبه بتلت كبير

ثانيا انا حبعت اميل لوائل عباس علشان ييجي هو وحسام الحملاوي وحيصورواالاعتصام

وعمليه الخطف مباشره فيما يعرف بالتدوين الحي وكله حيترفع اول باول علي يوتيوب

وانت عارف الداخليه من ساعت عماد الكبيروهما بيقلقو من المواضيع دي

طب تمام

لا لسه دانت مكلف يا ابني

فريق صوت في الزحمه هو ومسار اجباري حيكونو جايين يعملو حفله علي شريط السكه

الحديد فوق 45 بالظبط طبعا ده حيلخم الصيع وحيبقو مشغولين بالحريم اللي حتيجي

ومتخافش عملت اعلان علي الفيسبوك احتمال جار القمر يغطي الحفله متخافش انت في قلبي

امتي

ان شاء الله يوم الخميس لان اسكندريلا جي في الجزويت الاربع واحنا عايزين اكبر عدد

ممكن وخلي بالك النقطه علي محطه قطر سيدي بشر بتقفل الساع 3.30 يعني احنا مقدمناش

الا قطر 3.10 يتلحقه يا محمد الاحمر حيجاعيك فهمت

لازم تلحق قطر 3.10 والا حتتجاعا

يعني ايه حتتجاعي

لم يرد وابتسم في غموض وادار وجهه ناحيه ساميه

المكان( موقف المعهد الديني بس مش عنده بالظبط لانه اتشال والعربيات بقت تحمل قبله

بشويه علشان الظابط وحوارات الحضانه)

حمو: بقولك ايه يا بسكوته عايزك في خدمه

امر

يوم الخميس الساعه 3 الضهر الاقيك علي الشارع حناخد واحد ونطلع علي محطه سيدي بشر

طب منطلع بيه علي محطه العصافره قبلي

تصدق ياض انت حتتجاعا

يعني ايه

ابتسم له في غموض متنساش 3 بالظبط سلام يا غالي

المكان(شارع 45عند تاني ملف مكان وقوف التكاتك)

الزمان(الخميس الساعه 2.30)

اصوات احتجاج عاليه وسب دين وائل عباس يصور فيديو لاحد السائقين:

مهو مش معقول يا بيه ننزل الزبون ياخدونا حضانه نركب الزبون برده ياخدونا حضانه احا

تسمع اصوات بروفه فريق مسار اجباري علي اول الشارع الواد اللي بيلعب علي الباص

جيتار عيل مشكله

جار القمر مبدي علامات البلاهه وبيصور في الخباثه ولما ظابط وقفه استغل شكله الشبيه

باليابانيين وقاله انه مراسل وكاله اخبار صينيه بتغطي المعرض الصيني في شارع 30

والمشروع نزله غلط( يا ابن اللعيبه)

وفجاءه جت عربيه طوب احمر وقفت في وسط الشارع ونزل منها 5 انفار ويتقدمهم محمد

الاحمر

يالله يا ولاد الوسخه وهاتك يا حدف طوب

دانتم حتتجاعم كلكم

وهاتك يا سب الدين وشتيمه لحد مقرب الطوب اللي في العربيه يخلص وفي اثناء انغماس

محمد الاحمر في كسر القالب نصين علشان يكفي العساكر المبدورين في الشارع راح حمو

ظرفه بضهر التلت علي راسه وسحبه بهدوء محدش من حبايب الاحمر خد باله كانو

مشغولين مع مزز الحفله علي قمه الشارع لحد موصل بيه علي القمه كان ساعتها بسكوته

جاي بالمشروع الدايهاتسو العالي

ايدك معايا يا بسكوته عتبه المشروع عليا اوي

ايه ده دا الاحمر

منا عارف

لا يا عم انا مليش دعوه

حتتخولن دلوقتي جي في الاخر وتتعولق انجز دول لمحونا وشكلهم جايين بسرعه

طيب بس انجز

محمد الاحمر:بقولك ايه بصوت واهن(فاق من ضربه التلت)

بسكوته:ايون

الاحمر: ممكن تشغلي اغنيه انا مش عارفني للبرنس عبد الباسط (اللي هو حيرحل ويسيب

الشجر حزين)

تأثر بسكوته من الموقف وتأثر حمو وبكوا جميعا

المكان(محطه قطر سيدي بشر)

حمو يحاول جاهدا للدخول بالاحمر من باب المحطه بس بتوع الخضار سدين الباب(

بيفرشوا علشان يلقطو اللي جي من القطر وهو نازل او طالع من باب المحطه ورغم ان

الضابط بتاع النقطه مشاهم كذا مره بس هم كل مره بيراضوه وبيعملو الواجب) ومش

عارف يعدي بيه وبعد عذاب عيل شال قفص وعداهم بعد ما ظرفه حمو نص جني

علي المحطه وقف الناس كلهم ينظرو بحذر وهيبه لمحمد الاحمر المتثبت في جانبه بتلت

حمو خده قعدو علي استراحه المحطه وراح يقطع تذكرتين بجنيه

مينفعش

حتي انت جبان ومش راضي حتي تقطعلي

لا علشان التذكره غلت بقت فب الشباك ب75 وفي القطر بجنيه فهات كمان نص جنيه

طب والاشتراكات كده غلت هي كمان

امال ايه الطلبه ارتفع من 20 ل 25

طب والعادي

لا بقي ب 120

بس الصراحه وفر بردك

والله القطر ده زمان كان حكايه منهم لله اللي بوظوه علي العموم ربنا معاك

ربنا معانا كلنا

التفت حمو خلفه فلم يجد محمد الاحمر عس عليه المحطه كلها لحد ملاقاه واقف عند بتاع

الكتب

مهربتش ليه

اصل وانا جاي انزل من السلم لقيت روجرز بتاعت ناجي عن عم احمد قلت بدل ما

اوصي حد من القاهره يجيبلي قلت بالمره


شوفت بقي ادي اخره الكيف اللي بيذل

هم 5 دقايق وحتلاقي مشاريع المعهد الديني كلها هنا وساعتها حتتجاعا

بس الزمن حيفتكر ان انا الوحيد اللي قدر يوصل محمد الاحمر للمحطه

انت متجوز يا حمو

ايون وواخد شقه ايجار جديد في فرعون

فين فرعون دي

ورا عزبه سكينه وانت جي من السكه الجديده

وعلي كام الشقه تمليك في الحته دي

والله علي العضم ب20 الف

كسم المحافظ الجديد موقف البنا ومغلي علينا

شكله حيتجاعا وضحكنا سويا

سمعنا دوشه وصوت عالي وفجاءه المحطه اتمليت بشريه راح حمو شادد الاحمر عليه

وحاطط التلت في جنبه

حمو:حنقف مع بعض هاديين لحد قطر 3.10 ماييجي حركب ولا منشاف ولا من دري

واديكم شايفين عساكر النقطه مش حيسيبوكم ونظر لوائل عباس(اللي لسه واصل)

وللمخبرين نظره ذات معني

تعالت الاصوات (لا احنا مش حنمشي مين يقدر يسيب البرنس وحش الجبال) وراح جه

عيل مندفع بسيف وهو يصيح بعلو صوته(يالغاليييييييييييييييييييييي) قام رزعه المخبر قفا

قعده

حمو:اديكم شوفتم محدش عايز شوشره ولا قلق بلاش تهور فاضل 5 دقايق

راح واحد طلع قال ميهميناش يا جماعه وخطب في جمهور المحطه اي حد يموت عسكري

او مخبر ليه 2 كيلو هريسه من احمد حسنين واشتراك قطر لمده سنه طلبه او عادي

تعالت همهمات رواد المحطه وكثير منهم انضموا للعيال الباد فيوز واتكاترو علي بتوع

نقطه الشرطه لحد مفنشو واستنو

كبيرهم:خلاص يا حمو الموضوع خلص حتي لو القطر جه مش حيلحق يروح سيدي جابر

حمو:اوعي حد يقرب

كبيرهم: فكر وقول عقبال ماطرطر واجي

الاحمر: حتتجاعا

حمو:طب ممكن اعرف قبل ما ييجي يعني ايه

الاحمر:انا حعترفلك بسر انا معرفش يعني ايه حتتجاعا

حمو:طب انا كمان عايز اعترفلك بسر في لحظه الصفا دي انا مش متجوز انا مرافق

وكنت عايز اعمل حركه قدامها

نظر له الاحمر بتاثر وقاله:انت راجل يا حمو وانا حركب معاك القطر

ودار في ذهنهما جميع الذكريات المشتركه (التلت /اغنيه عبد الباسط/روجرز/تذكره القطر)

ودمعت عيونهم

3.10 القطر جي علي المحطه وكلك واقف مستني لحظه دخول القطر وفجاءه الاحمر

سحب التلت من حمو ودورالضرب في العيال كلها ومشاهم وراح زاقق حمو في القطر

ونط وراه

حمو:انت ليه عملت كده

الاحمر: انت راجل وانا مش عايزك تبان عرص قدام الشرموطه وحقولك سر انا روحت

قسم باب شرقي قبل كده مرتين ومبيتش ليله واحده غمزت المخله ب 20 جنيه وابتسم بحكمه

انزل انت يا حمو ارجع لفرعون لرفيقتك وقولها انا اللي ركبت محمد الاحمر القطر

حمو:بس مش حلاقي مشاريع عوايد دلوقت

الاحمر :اركب ساعه ومن هناك خد عوايد

وحضنو بعض ونط حمو من القطر

عند درباله شد الاحمر النفس بتاع القطر ونط