Wednesday, September 25, 2013

ديموس







ديموس كان شعره ناعم وتقيل فكان بيطوله ويسيبه كده حر ورا ضهره وكان مكنف دمبلين 15 ووزن وبار زجزاج علي السطوح كان بيتمرن بيهم كل يوم بعد العصر فتلاقي جسمه كان شادد ومقسم





كان بيروح يصطبح في الجمعية النوبية في شارع ابن الخطاب في محطه مصر هو وصاحبه صالح وكان بيبير مع صاحبهم التالت علاء في الجراج اللي في سابا باشا قدام نادي المهندسين ايام ستيلا ما كانت بتنزل ازايز بني





كان شغال في ورشة ابوه من وهو في اولي اعدادي وبالتالي لما راح مدرسه محمد علي الصناعية كان متصيت فشخ لانه كان اسرع احد يخلص التمارين المطلوبة منه رغم انه مبيحضرش حصة الورشة اساسا





اوضته كانت مدهونة اسود ومليانه بوسترات حميد الشاعري اللي مكنش بيفوتله حفله او شريط ومغيرش لونها الا بعد الواقعة الشهيرة لما في عيد ميلاده صالح وعلاء جابو الساوندات الخشب الطويله دي ومايك علشان يحتفلو بيه وسربو بت شرموطه من " المأوي " شربت معاهم دبوس في الاوضه ولما راحت منها مسكت المايك وقعدت تغني وابوه قطع علي الحوار وشال بوسترات حميد وبيض الاوضه ازرق .





ديموس كان مصاحب اخت صالح وكان بيروح هو وصالح واخته وعلاء البحر قدام وردة العصافرة كل يوم حد وصالح مكنش قافش خالص وبعدين يروحو يشربو تفاحة كاختراع جديد في قهوة  "حموده"    في ضهر قهوة "والي " في شارع تانيس





ديموس راح ليبيا سنة  ولما رجع اتجوز من شارع الجواهر في الحضرة ولسه شغال في الورشه بتاعت ابوه ومضيع فلوسه علي الفاكهه والكفته المشوية











  • الصور من الاسكتدرية 1980 بعدسة manfred lentz

Thursday, September 19, 2013

بدءا من نجوي وصولا الي أشرف






 انا وعزت ونجوي كنا صحاب 
انا ونجوي اتجوزنا 
انا وعزت ونجوي فضلنا صحاب 

لما كنت بقابل عزت كان وهو مروح علطول بيقولي " ابقي سلملي علي نجوي "

من فترة سمعت انه خد المحل اللي تحت البيت عنده وقلبه جامع ولما روحت اصلي العصر عنده واباركله قالي " متنساش والنبي تبقي تسلملي علي المدام "

عزت مكنش عاجبه نظام القلل اللي بتتحط علي مدخل الباب في الجامع راح دخل جمعية وقبضها التالت وراح اشتري كولدير للجامع وافتكر ا اني روحت الجامع اصلي المغرب  اباركله ع الكولدير راح قايلي " متنساش والنبي تسلملي ع الجماعة "

عزت طلع معاش وقرر انه يزود دخله علشان فرق الحوافز اللي راح لما طلع معاش بانه يعمل جمعية في الجامع ويطلع عمرات للرواد فانا روحت اصلي العشا اباركله راح قايلي " متنساش والنبي تسلملي ع العيال "


                                      




مقدرش امنع نفسي من ابتسامة لما اشوف واحدة ست راجعه من السوق ولمحت صاحبتها جاية من اول الشارع تروح قايلة " ازيك يا اشرف "  تقوم التانيه رادة عليها " بخير والله يا حمدي "