Tuesday, January 22, 2013

ساتان رمادي




عزيزتي نورا  :
ازيك وعاملة ايه وياترى الحياة اخدتك لفين , اتجوزتي ولا لسة سنجل  , ياترى اتحجبتي زي كل البنات بتوع جيلنا تقريبا اللي كنا نعرفهم وضربتي كارينا زيهم, ولا لسة روشة وشعنونة زي ما انتي, ما تعرفيش انتي وحشاني ازاي وبتيجي على بالي قد ايه , اوقات كتير بالليل  بقعد افتكرك وافتكر ايامنا الخوالي وايام صياعتنا وشقاوتناو واصحى اكتب حبة في الفيس بوك عن جمل كنتي قلتيها او موقف حصلنا , من كتر ما انا نفسي اكلمك ومش عارفة اوصلك قررت ابعتلك رسالة كنوع من تفريغ كل شحنة الكلام اللي جوايا انا عارفة ان الرسالة مش هتوصلك بس اهو على الاقل اكون طلعت اللي جويا من ذكريات محصراني , وحنين ليك هيموتني
, فاكرة يا نورا  قد ايه كنا صغيرين ومقططين وكنا ناقمين على ده اوي علشان كل البنات اللي من شلتنا كانوا بقوا عمالقة الا احنا , فاكرة مدى رغبتنا في ان يبقى عندنا خط الاستواء الخط اللي بيفصل بين الصدرين زي ما كنا مسمينه, فاكرة لما مدرسة علم النفس بنت الوسخة طبقت نظرية اللي بيعانوا من داء الفروق الفردية بمثال زي البنات اللي  صدرهم صغير وانا نزلتلك مبضونة وانتي قعدتي تقولي دين امها وتهديني, فاكرة يا نورا قد ايه كنا بنكره مياعة البنات وعلوقيتهم وكنا بنحب لبس الرابرز والجزم الاسبورتيف خصوصا ماركة ليكوكسبورتيف وتيشرتات اللي شبه بتاعة الكرة اللي كانت ماركة اسمها امبرخر المانية, فاكرة كنا بنمشي حاضنين بعض وطولنا تقريبا زي بعض و ونقعد نغني  اغاني لعدوية, فاكرة عربية البطاطس اللي كنا بنروح ناكل فيها شبه تلات مرات اسبوعيا جنب جراند مول ونقعد نتفرج على المزز, فاكرة لما فجاة انتي خليتي بيا وكملتي نمو وطولتي وبقيتي عندك خط استواء وسبتيني اعاني من داء الفروق الفردية لوحدي , انا فاكرة كويس اول برا جالك هدية من كندا وكان وهمي وشيك فشخ ولونه رمادي وفيه ساتان ودانتيل وكان مش قدك بعد ما كبرتي كدة وبقيت مقلوظة واديتهولي هدية وكان اول برا البسه في حياتي هدية منك و انا فاكرة قد ايه انا كنت ضد فكرة البرا وانه ايه لازمته لو احنا صدرنا مش محتاج , بس انتي بصراحة بهرتيني بالبرا ده وعجبني وخلتيني اغير فكرتي وبقيت مجنونة بشراء البراهات عموما, فاكرة يا نورا الواد خالد لما سميتيه خالد موج البحر , فاكرة قعداتنا في بيتك في دار السلام واحنا بنتفرج على افلام عادل امام بتاعة السبعينات والتمانيات  وايمان اختك تحضرلنا الجيلي والكبدة الاسكندراني, انا فاكرة كويس المش بتاع امك اللي عمري ما دوقت زيه لحد دلوقتي و امك وحشتني اوي يا نورا, فاكرة  لما كنا دايما نفسنا نسهر في راس السنة وكنا دايما بنروح نقضيها ياما عند عربية البطاطس ياما عند فاميلي لاند ونسيب البت بسمة عصام تظبط مع صاحبها واحنا قاعدين نتفرج على اللي رايحين والي جايين كعادتنا ,  كان نفسنا نسهر اوي  في راس السنة وعمرنا ما عرفنا نعمل ده  , دلوقتي يا نورا بعد ما بقيت ينفع اعرف اسهر احب اقلك اني مبحبش الجو الملزق والصخب والترتر واللي بيلعللط بتاع راس السنة ياترى انتي سهرتي مرة ولا لسة, فاكرة يا نورا اول بوسة اتبستها في حياتي كانت قدامك كانت مع اول حد ارتبط بيه فعليا فاكرة وعلقتيلي على البوسة بعد كدة  تعليق بهرني, فاكرة يا نورا لما فاتورة تيلفون بيتنا جتلي 8 الاف جنيه وطبعا ده كان رقم مهوول ساعتها   وانا كنت علشان برغي مع الواد صاحبي طول الوقت ولما عرفت ان اهلي هيجبوا كشف بارقام التيلفون بعتلك رقمه وقلتلك قولي انه رقمك  وشيلتيني في الموقف ده وعدى على خير و رغم ان التيلفون اتشال بس انتي دايما كنتي جدعة معايا يا حبيبتي , انا مش عارفة افتكر ايه ولا ايه بس انا نفسي  اشوفك اوي ونقعد نضحك ونرقص ونغني وناكل ونعاكس البنات زي زمان , فاكرة يا نورا لما كنا بنلبس واسع زي الرابرز وكاسكيت او بريه ونمشي مع البت بسمة مزة الشارع بتاعي وكانوا الولاد بيبقوا مش عارفين احنا ولاد ولا بنات, انا عندي امل يا نوراتي اني اشوفك وهفضل عايشة على الامل ده كمان نفسي تعرفي بنتي اوي اكيد هتحبيها وهتحبك هي مش بتعرف عربي اوي بس من اول الكلمات اللي عرفتها كانت نورا, بحبك  يا نورا واتمنى تكوني منطلقة وسعيدة وزي ما انتي وما اتغيرتيش زي ناس كتير نعرفهم , اشوفك على خير وتجمعنا قعدة مش وعيش من بتاع امك اللي بتعمله في فرن بيت جدتك. سلام يا صاحبتي