حق الرد

بضرب ايدي في جيب سروالي لقيت البوست ده بتاع بهظ بيه وحديثه عن التجاريه
في البدء هو ليس بسكندري فيجب اخذ الكثير من كلامه بالحذر والريبه
التصنيفات دي مش دقيقه وفي لبس واضح بين القهوه والكافيه
ثانيا بالنسبه للاسعار فهي تراث
فخد الحكمادي من اخوك الجعيدي
حسب اخر تصنيف للاسعار عام(2003)تبلغ قيمه حجر المعسل الواحد نص جنيه والتنباك جني واحنا 2009 يا برنس
طبعا بخلاف التفاحه وما شابهها ودي بالميت جني ونص في اقل حته
الشاي من جني وطالع و75 في قهوه الطلبات
بالنسبه لتصنيف القهاوي
1 قهوه طلبات: دي في الاساس بتطلع مشاريب للمحلات المجاوره وبيعملها سبوبه ويرص كرسيين بلاستيك يصطاد اي حد طياري ودي ارخص اسعار تلاقيها فيها بس دون المستوي خالص
2 قهوه معاشات :زي (والي) اللي علي الترام او البحروالقاهره ووادي النيل وان كانت تضم بعض شباب المدونين في الاونه الاخيره
والتجاريه بس بتاعه سيدي بشردي بقي حاجه عظمه شطرنج او طاوله الدمينو فيها ضعيف المستوي القهاوي دي بتتميز بالهدوء والرز باللبن والمعسل المظبوط
3 قهوه العيال السرس :دي بقي زي الصباحي في محمد نجيب والفراعنه في اسكندر ابراهيم ودي اسوء مكان ممكن تقعد فيه في الحياه الا لو انت شاب سرس ده موضوع تاني العيال كلها تيشرتات بمبي او ترتر وبيضربو سندوتشات دليفري وزبادي خلاط وتفاحه او كنتلوب وعايز يعيش دور الشاب البيئه بس بيبقي بيضه شمال
4 قهوه شقط:يعني تجيب شراميط منها ودي زادت في الاونه الاخيره علي راسهم جلاكسي والريحاني والشمندوره(ايون اللي في سيدي جابر جنب الملعب اللي بيتأجر)ودي لابيه سلطنه استانلي عندك ثلاث حلول(القهوجي/الصبر والنظرات/البلوتوث)وربنا حيكرمك انوي انت بس
5 قهاوي الافتعال: التجاريه و البوابين و القهوه اللي جنب اسعد بتاع المخبوزات في ضهر مسرح محمد عبد الوهاب فيها حبايبنا بتوع ازايز الميه وشنط الكمساريه وممكن تلاقي فيها حريم من بتوع المسرح التجريبي برضه ملناش دعوه بيها
هناك قهوات خارج التصنيف لتدني المستوي بشكل فظيع (زي قهوه وزه وولده كوكب)في الباب الجديد او لارتفاع المستوي بشكل ملحوظ زي السندريلا (برضه في الباب الجديد)وبالتالي لا يصح ادراجهم معنا
اما فريسكا وستاربكس وسيلانترو ولاتينو فلا تعليق وهم مش قهاوي اصلا
هناك بنيكات شاي علي البحر :) ودي موضوع سنخصص له بوست مستقل
بالنسبه لموضوع عربيات الفول فهو ايضا غير صحيح انما هي عربيات كبده وسدق زي عم عثمان جنب وادي النيل واشرف جنب الحجار وعلي جنب الاميره وحتي عربيات الكبده دي ليها ادبيات ليس محل ذكرها الان .عربيات الفول انقرضت من جنب القهاوي مذ ردح من الزمن ياه قديم اوي انت
الخلاصه:مش اي حد قعد كام سنه في اسكندريه حيتكلم عن القهاوي اللي فيها(الكلام ليك يا بهظ) تمام
اقعد في ابوشوشه او الدراويش حاله وسط
متتصورش وانت بتشرب شيشه لا بموبايلك ولا بموبايل غيرك
حلو كده كفايه