اسكندريه مش بس ستانلي ومحطه الرمل و جليم اسكندريه مش بس سينما امير و مترو وجاد اللي عند البنوك اسكندريه مش بس الجزويت ومركز الثقافه الفرنسي اسكندريه مش بس اسكندر ابراهيم وميامي امال فين العصافره وابو خروف وارض التوته فين الفلكي والسكه الجديده وعزبه سكينه فين زعربانه وارض شاكوس
امال فين عمو فؤاد بتاع الكبده اللي لسه الرغيف عنده ب 75 صاغ امال فين قهوه السندريلا في الباب الجديد والشاي ابو نص جنيه فين بنيكات الحشيش في الضاهريه و 45 فين بلطجيه ابو خروف و الكتان فين ملاهي الفقي في الساعه فين فسقيه الميه اللي الناس حولتها حمام سباحه في الصيف عند سنترال مصطفي كامل امال فين السكه الحديد اللي بتقسم البلد نصين قبلي وبحري فين الاطه بحري و شعبيه قبلي فين نادي فيديو اشرف درباله وافلامه الهندي فين حلواني الرضا وعلبه جاتوه الافراح ام 2 جنيه فيها بست وباسته ومنديل ملون فين المعهد الديني وميكروبصاته اللي بتحمل في نص الشارع وعمر السواق ميزدش باي حال من الاحوال عن 15 سنه فين نادي التعاون اللي مفيهوش غير ترابيزه بنج واحده ومتصور جنبها مسئول من الحي فين ارض الفضالي ودورات الكوره فين مساكن فيصل والعيال اللي بتسبت بالكلاب ومدرسه الفاروق اللي بناتها بيتاخدو في جراجات المدينه
ولعب الكوره في الصيف فين سينما باكوس اللي فيها بروجرام تلات افلام ب 3 جنيه وريال ولما يجي الفيلم الهندي العيال تسخن وتضرب بعض فين كشري هدير والمدهش والصاروخ فين التجاريه وسوق ليبيا
هي دي اسكندريه اللي بنشوفها كل يوم ولينا فيها ذكريات هي دي الاماكن اللي بنروحها ولعبنا فيها واحنا صغيرين هي دي الاماكن اللي اتثبتنا فيها واتاخدت موبايلاتنا
في الحتت دي حتلاقي التوكتوك والمكن والفسب
حتلاقي الشراميط والبنطلونات الجينز ام جلد علي الجيب هنا حتسمع ايه يا صاحبي ولا مؤاخده اختي هي دي اسكندريه واللي يقولك غير كده يبقي بيضحك عليك
10 comments:
الله عليك يا هيثم والله عندك حق اسكندرية مش سان استفانو ولاتينو كافية وابوفارس و711 وزهران لا اسكندرية بالظبط زى مأنت وصفت كدة وانا عن نفسى عم فؤاد عندى بالدنيا ومفيها
بس انت نسيت عم علاء الى فى الحضرة والى ساندوتش الكبدة البلدى عندة بقا بجنية وربع بعد جنية للاسف مقدرش يقف قدام طوفان غلاء الاسعار وبردو مننساش ابو اميرة الراجل الطيب ابو رجل واحدة الى قاعد قدام الحمامات بتاعت محطة فيكتوريا ترام وعربيات الفول الى اتربينا عليها بدول بقا تكتمل اسكندرية من وجهة نظرى على الاقل
اييييييييييييييه يا عم انت نسيت جمهورية ابوسليمان ولا ايه
لا والله واجدع تحيه عشوائيه لمنطقه ابوسليمان وضواحيها
وسمعني العبد والشيطان
wooooooow i do really like ur blog n this topic specially likable thx for ur Alex image thats how we like it
Visit my blog
MoOoN
tnx for yur visit moon
مش عيب تنسو مجمع المدارس و اضغط علي الزر يختفي المدرس
و عم فيتش بتاع السلاسل
وابو نسمة بتاع المطار و عم عباس بتاع الشاي
الله عليكي يا اسكندرية
ايه يا جماعه .. و راحت فين قلعه سيدي الموندي ؟؟ :D:D:D:
اسكندريه هي الشتا الجميل و الروقان و الخروجات
الله يرحم البياصه و مراجيحها اللي كنت تدي للراجل 1/2 جنيه كان يركبك 3 ايام فيها
و قبلي و ترابيزات البنج و العيال اللي ماليين الشارع
في بحري السكه متشوفش طفل في الشارع بس انزل المحطه و كرموز حتلاقي العيال اكتر من عمال مصنع الاسمنت
الف مبروك علي المدونه يا صاحبـــــــــــــي
قشطة عليك انت تعرف نادي التعاون ، يبقى انت جار قديم بقى يا باشا ، انا كنت ساكن زمان في الشارع بتاع نادي التعاون
بس انت ظلمته ، النادي كان فيه طرابيزة بلياردو برده وتليفزيون بيزيع ماتشات الأهلي
طول عمره وكر النادي ده وعلي الفكره التليفزيون لسه موجود
هههههههههههههههههه
انا امبارح زورت ارض التوته ... اخت جارتنا حتتجوز هناك
انا فرحتلها اوي .. اول نصيبها في ارض التوته (( ربنا معاها )) ه
بس الحمد لله مغوطناش جوه اوي
:D:D:D:D:D:D
Post a Comment