الجزيره

طول عمري كان عندي قناعه بفكره الجزيره في اسكندريه وان كل 10 سنين بيظهر مكان جديد يصلح لان يكون جزيره جديده تضاف للي موجود فعلا .

الجزيره هي مكان انت بتسكن فيه وبتشتغل فيه، موجود فيه سوق خضار وممكن تشتري كمبيوتر ودش من الجزيره  وتصلحه فيها برده وفيه مستشفيات ومعامل تحاليل ومدارس للاولاد خاصه ولغات وحكومه ووسائل ترفيه ووسائل انتقال داخليه  وهكذا، ودايما بيكون الربط بينه وبين باقي اسكندريه ضعيف ووسائل الخروج من الجزيره صعبه وزحمه وغير متاحه بصوره دائمه.

الجزر دي ممكن يجي عليها وقت وتتربط بباقي اسكندريه واحيانا بتظل جزيره زي ما هي حتي بعد مرور 10 و 15 سنه علي وجودها، العجمي مثال صارخ وصريح لده وأي حد ساكن في الهانوفيل او البيطاش او حتي ال 21 حيأكدلك المعلومه دي وانه ممكن يقعد 6 شهور ميطلعش من العجمي اطلاقا ، الفلكي والمندره قبلي وطوسون لعبو الادوار دي في مراحل سابقه انما لاتزال تجربه سيدي بشر كأول وأقدم جزيره في اسكندريه هي المثال الابرز والتجربه الاكثر اكتمالا

المواصلات :

 سيدي بشر كانت  منطقه صحراويه غير مأهوله بالسكان لا يصلها الترام وخط السكه الحديد كان يصلها بخط  واحد بس للي نازل البلد او  اللي طالع ابوقير ولو قطارين قابلو بعض بيستنو في التحويله ، او تستني اتوبيس 224 الذي لا يأتي ابدا  

مش حتكلم عن الميني باص الاشهر 777 لانه تجربه لم يكتب لها الاكتمال رغم انها لو اخذت وضعها وفتره زمنيه معقوله كان ممكن تكون سيدي بشر بتلعب دور سموحه دلوقتي 

 

واحقاقا للحق ان سيدي بشر هي الجزيره الاولي اللي ادي تواجدها الي اختراع اعظم وسيله مواصلات في اخر 20 سنه ( المشروع)

الفكره ظهرت ان كان في راجل علي المعاش عنده عربيه بيجو 7 راكب راح سكن في سيدي بشر وجاله فكره انه يربط راكبي الترام بسيدي بشر ويحفز علي الانتقال لسيدي بشر حتي ولو لم يصلها الترام عن طريق وصله تربطك من محطه سيدي بشرترام ( ده مكان قبل فيكتوريا مش في سيدي بشر خالص بس هو اسمه كده ) لحد حي المنتزه اللي هو عاصمه سيدي بشر، طبعا الفكره انتشرت وبقي في اسطول بيجو 7 راكب واتطورت الفكره وبقي في موقف وبقي فيه بلطجي الموقف ودخلت الميكروباصات الياباني وبدأت اسطوره المشروع او الميكروباص في التحقق.

وده فيما بعد اللي كسر فكرة ان سيدي بشر جزيره لما ظهرت العربيات التويوتا الحمرا سنه 1995 واشتغل خط العصافره – بحري العظيم

الاسواق:

هنا بقي كان لازم سوق القاهره يظهر ويتحول من شارع هامشي غير مسفلت بتتصلح فيه عربيات النقل الخاصه بوالد عيد احمد لاعب الاتحاد السكندري السابق الي اهم سوق للخضار في شرق المدينه كله ويخفت صوت شارع سيف للابد .

ممكن نعتبر سوق درباله سوق مهم في الجزيره لكنه ليس الاول ولا الاشهر.

الخدمات العلاجيه :

ده كان مواكب بزوغ نجم مستشفي شرق المدينه لخدمه المرتحلين الجدد الي تلك الجزيره خصوصا بعد لما بقت نص استثماري ونص قطاع اعمال .

السياحه :

كان لازم يكون فيه ايقونه  خاصه بسيدي بشر لاستقبال السياح والوافدين للجزيره مش بس من باقي اسكندريه لأ ده وكمان من باقي المحافظات هنا بقي كان دور هريسه احمد حسنين ، ويمكن ده اللي ساعد شارع سيف شويه انه ميندثرش وياخد رقم زي شوارع كتير اتحولت من شوارع ليها اسماء رنانه الي مجرد شوارع باسماء ارقام زي شارع 15 شارع 66 وهكذا

احمد حسنين كان من اوائل الناس اللي بتعمل توليفه الهريسه اللي مليانه سمنه ومكسرات وبسعر متدني بالمعني الحقيقي للكلمه واظن ان سعر الكيلو ظل ب 5 جنيهات طوال النص التاني من التسعينات كلها مرورا بالالفيه وبعد كده ظهرت بقي المحاولات المشوهه للفكره متمثله في هريسه اولاد رزق في شارع الجلاء وابراهيم الغفير في محرم بك بس مازال حتي الان لاحمد حسنين رونقه الخاص

التكنولوجيا :

حد ينكر ان اشارع ملك حفني هو اهم سوق للرسيفرات واطباق الاستقبال في وجه بحري كله مش في اسكندريه بس ولو مش مصدق روح هنا حتلاقي بالتفصيل ان سيدي بشر من اول اعتبارها كجزيره صنعت اسطوره خاصه بيها

التعليم:

 

طبعا بزوخ نجم مدرسه علي بن ابي طالب ومحاولاتها احتلال مكانه جيده امام العملاق البرجوازي مدرسه عبدالله النديم في مسابقات اوائل الطلبه واعداد الطلبه اللي ليهم ترتيب علي المحافظه في المرحله الاعداديه لا يمكن نسيانها علي الاطلاق، وعلي الجانب الاخر مدرسه السلام اللي هي اول مدرسه الغت فكره التزويغ في اسكندريه بانهم شالو السور اصلا وطبقو نظريه التعليم ( المفتوح ) .

عارف ان مدرسه جمال عبد الناصر الثانويه في فيكتوريا وانها المنافس الوحيد للمكان القميء المسمي بالعباسيه وان جمال عبد الناصر فخر شرق المدينه كله مش سيدي بشر بس ، بس انا حابب اسأل كل اللي كان في جمال عبد الناصر ( هل حسيت وانت فيها انك خرجت بره سيدي بشر وان فيها جالك شعور الاغتراب ولو لحظه؟؟)

الترفيه :

عصام الساحر كان بيلعب نفس الدور اللي كان بيلعبه احمد الامريكاني في الابراهيميه ممكن تقرا عن عصام الساحر هنا بس انا كنت عايز أأكد  علي نقطه ان عصام الساحر مش بس كان بتاع العاب ومقالب زي احمد الامريكاني لأ اكاد اجزم انه اول من ادخل فكره تبادل منتجات المؤسسه العربيه الحديثه للنشر بدلا من انتاج محمود سالم والمكتبه الخضراء ، عصام الساحر هو من اهم الابواق الاعلاميه اللي لمعت نجم نبيل فاروق واحمد خالد توفيق في شرق المدينه قاطبه مش بس سيدي بشر

كل فتره بحاول اكتشف الجزر الجديده في اسكندريه ودعائم الحياه فيها وبزعل لما بتتربط بباقي المدينه  لانك بتتشوه في الحاله دي ومش بيكون ليك خصوصيه وذكريات مغلقه وتقعد تشير كوبري استانلي زي الاهبل علي الفيسبوك او تطلع من المسيره اللي في القائد ابراهيم وتتجاهل المسيره اللي طالعه من خليل حماده اللي هي طالعه من نفس جزيرتك.

عزيزي المواطن السكندري قاطن الجزيره افخر فانت تغير معالم مدينه موجوده من الالاف السنيين وتصنع مستقبلها