الكفته اولا يا ولاد الكلب

 

شارع المعهد الديني في العصافره قبلي في عصر المحافظ محمد عبد السلام المحجوب كان عباره عن سوق من كتله واحده وممرات صغيره بين الاكشاك والعشش علشان الناس تعرف تمشي وتشتري وطبعا لا تكفي لمرور السيارات علي الاطلاق . اي حد من شرق الاسكندريه يعرف يعني اي المعهد الديني وايه اشكال الناس اللي كانت بتفرش وبتبيع هناك . عبد السلام المحجوب عمره ما فكر ينقل السوق من هناك اوحتي ينظم العمليه شويه .

عادل لبيب لما مسك اسكندريه عمل سوق بديل في شارع تلاتين مكان مغلق مجهز يكفي لكل الباعه الجائلين في سوق المعهد الديني ويفيض طبعا البياعين رفضوا وفضلوا متمسكين بالسوق القديم .

حمله من شرطه المرافق والامن المركزي نقلوا الناس من السوق بعد معركه طاحنه وبعدين الاكشاك والعشش اتشالت والسوق اترصف واتحط فيه زرع وبقي حارتين رايح جي وبقي طريق رئيسي زي شارع 45 بالظبط والبياعين اللي كانو فارشين في نص الشارع راحو السوق اللي في شارع تلاتين وبقت الحياه ممتازه .

علي فكره سوق المعهد الديني رجع تاني وبصراحه الناس الغلابه لازم تفرش وتسترزق والمفروض نأجل الدستور ونحاول نساعدهم في بناء العشش والاكشاك تاني وميرجعوش السوق البعيد الوحش لان الفقراء اولا

-----------------------------------------------------------------------------

انا مقدرش انسي شكل عربيه المطافي اللي اتسرقت وكان بيسوقها شاب عريان الا من شورت احمر ماسك ميكرفون بيغني العنب والعربيه عليها ما يزيد عن 40 او 50 فرد  ووراهم عربيات نص نقل مليانه بشر وسلاح ابيض مش فارق معاهم اذا كان الدستور الاول او لأ فعلا ، في طريقهم لاحراق قسم سيدي جابر بعد الانتهاء من مهمه قسم باب شرق . نظره الخوف والفزع في عيون المتظاهرين اللي هم من بتوع الدستور اولا لا تنسي ليس فزع من الشرطه او الامن المركزي بل فزع من سياره المطافي وما يحوطها من بشر .

 ------------------------------------------------------------------

ملاحظات غير ثوريه

الكلام اللي بيقوله محمود عزت في اللينك اللي فوق وهو كان احد اطباء المستشفي الميداني في التحرير تقريبا اتكرر معايا وناس كتير اعرفهم في القاهره واسكندريه ومحافظات اخري كان فيها مركز رئيسي للتظاهر والاعتصام . ناس كتير من اللي مش فارق معاها الدستور اولا كانت عايزه مبارك يكمل ال 9 شهور او حتي يكمل علطول (علشان احنا مش لازم ننسي انجازات مبارك ).

 كان ساعتها المفروض فعلا نسمع الفقراء اولا ونشوف كانو بيقولو ايه

-----------------------------------------------------------------

المفروض عسكري الامن المركزي الطبيعي لما الظابط يقوله اضرب يعمل ايه؟؟ مش حيسمع كلام الظابط ومش حيضرب وسينتصر للانسانيه .

بعد المظاهره لما تنفض والناس تروح بيوتها العسكري اللي مضربش ده حيروح المعسكر والظابط اللي قاله اضرب ومسمعش كلامه حيعرفه بحق ربنا ازاي ينتصر للانسانيه كويس بعد كده وابقي قابلني لو حد افتكره .

علي فكره عسكري الامن المركزي مجند مش موظف وغلبان ولما حيخلص الجيش بتاعه ويخرج مش حيكون فارق معاه الدستور الاول ولا لأ ده اذا كان لسه عايش ومتحدفش عليه مولوتوف في العربيه

----------------------------------------------------------------

دايما بافكر لو انا ظابط وجالي امر بفض تجمهر او مظاهره الحل حيكون ايه ؟؟؟

علي فكره في اليونان في الاحداث الاخيره لما اعتصمو قدام البرلمان الامن بردو ضرب عليهم قنابل مسيله للدموع لفض الاعتصام