Tuesday, April 20, 2010

العالم في حجرك





حشرحلك واحده واحده كده علشان تفهم وبعدين نقول ايه الموضوع

احنا لما بنولد كهربا في مكان بعيد ونعوز ننقلها في المكان اللي حنستخدمها فيه اللي غالبا بيكون بعيد عن مكان التوليد بنعمل حاجه ظريفه جدا بنستخدم محول عند المحطه اللي بنولد عندها الكهربا ومحول عند المكان اللي بناخد فيه الكهربا

طيب ليه الحركه دي منوصل الكهربا اللي بنولدها علطول ايه لزمه المحولات دي

ركز بقي احنا بننقل كهربا خد بقي القانون ده

كهربا = تيار x فولت

بيس كده اركنه وحنرجعله تاني

انا لما بنقل اي حاجه لمسافه كبيره اكيد في نسبه فقد تخيل كده انت رايح تملي ميه من جارتكم اللي في الارضي علشان انت في الرابع مش طالعلك ميه الحله اللي مليتها من جارتك ربعها او اكتر اتكب علي السلم وانت طالع يعني في فقد في الميه علشان ايدك بتتهز مش ثابته مثال تاني علشان الحبايب وانت راجع من الشغل جيبت نص باتون ساليه من اسعد اللي في الشاطبي وانت ساكن في سيدي بشر عقبال لما تكون وصلت البيت حتلاقي النص بقي ربع علشان انت بطنجي وبتحب تاكل

القاعده

لما بنقل اي حاجه لمسافه جزء من الحاجه دي بيضيع مني بناء علي حاجه تانيه يعني لو ايدي ثابته وانا طالع السلم الميه اللي حتتكب حتقل ولو انا مش جعان مش حخلص الباتون ساليه كله حتلاقي النص كيلو تقريبا زي ما هو

الكهربا زي الميه والتيار زي ايدك اللي بتتهز كل لما تقلل التيار (ايدك اللي بتتنيل تتهز) كميه الفقد في الكهربا (حله الميه) بتقل

يبقي الاستنتاج اللوذعي اني علشان انقل كهربا مسافه كبيره اخلي التيار بتاعها اقل ما يمكن صغير نيك اوكي

ارجع بقي للمعادله اللي فوق (نكتبها تاني علشان اللي بيتوه مننا )

كهربا = تيار x فولت

كميه الكهربا اللي انا ولدتها ثابته كميه الكهربا اللي انا ولدتها ثابته كميه الكهربا اللي انا ولدتها ثابته افتكر دي كويس

يبقي لما اقلل التيار ايه اللي يزيد القولت ركز بس وحتجيبها هي الكهربا ثابته اقلل فولت التيار يزيد طب اقلل التيار الفولت يزيد يا رب تكون فهمت بس افتكر انا عايز اققلل التيار علشان الفقد في الكهربا يقل وانا بنقل اوعي تتوه مني

1 ولدت كميه كهربا ثابته

2 زودت الفولت علشان التيار يقل ونقلت الكهربا من مكان التوليد لمكان الاستهلاك

3 رجعت اقلل الفولت تاني علشان ارجع لقيمه التيار الطبيعي في المكان اللي حستهلك فيه الكهربا

مين بقي اللي بيقلل ويزود الفولت هو المحول ابن (.....) فهمت بقي المحول

واحد عند التوليد يزود الفولت وواحد عن الاستهلاك يقلل الفولت تمام يا باشا

ناخد بقي رسمه ظريفه للمحول ده علشان نفهم شغال ازاي



خليك معايا وانا حرسيك علي الليله ماشيه ازاي

تخيل الكهربا طالعه من المولد تمام قولنا عايزين نرفع الفولت بتاعه نقوم مدخلين الكهربا اللي طالعه من المولد علي السلك الاحمر ده شايفه اللي علي ايدك الشمال يطلع من الازرق كهربا قولتها عالي سبحان الله شوف يا مومن ولا سحر ولا شعوذه نمشي بقي المسافه اللي عايزينها لحد منوصل للحته اللي حنستهلك فيها الكهربا نحط محول زي اللي فوق بالظبط بس الكهربا بدل ما تخش علي الاحمر تروح فين ايون تمام تخش علي الازرق وتتطلع من الاحمر العكس بقي خليك صاحي معايا علشان ااقلل الفولت اللي انا رفعته

خد بالك كده من الرسمه اللي فوق بصلها كويس كمان بصه الكهربا لما بتخش في الاحمر وتطلع من الازرق او العكس مسالتش نفسك هو فين السلك اللي بيربط الاحمر بالازرق ايه كهربا بتمشي في الهوا رباني طول عمرنا عارفين كهربا يعني سلك اومال ايه اللي بيربط السلك الاحمر بالازرق ركز بقي في مربع رمادي اللي لافف عليه الاسلاك هو ده اللي بيوصل الكهربا من الاحمر للازرق والعكس

ممكن بقي انا اخلي الكهربا توصل من الاحمر للازرق من غير المربع الرمادي عم طريق اني اخلي الكهربا علي الاحمر ترددها زي تردد الكهربا علي الازرق تقوم الكهربا تمشي مثلا من الاحمر زي التعبان وتدور علي التردد اللي شبهها حتلاقيه فين في الازرق ويلا وصلنا كهربا وزي الفل وكس ام المربع الرمادي

ايه بقي لازمه اللك ده كله ايه يابني الملل ده

الجماعه في شركه witricity خلو الكهربا تمشي من الاحمر للازرق من غير المربع الرمادي ده في الهوا كل اللي بيعملوه جهاز في الفيشه بيبعت موجات بتردد(الاحمر) وجهاز علي كل جهاز(حلوه دي) بيستقبل الكهربا علي نفس التردد(الازرق) يعني خلو الهوا كأنه المربع الرمادي



احا بجد احا

عارف ده معناه ايه انك تحط سلك ازرق في الفيشه وسلك احمر علي اي جهاز عندك والكهربا توصل من الازرق للاحمر في الهوا يعني غساله وتليفزيون وتلاجه من غير فيشه

يعني تشحن موبايلك واللابتوب بتاعك وانت قاعد في الحمام بتسمع مارسيل خليفه علي يوتيوب وانت بتقضي حاجتك


جهاز ال pc كله مفيهوش سلك واحد كله wireless

الحياه حتبقي بدون اسلاك الكهربا بدون اسلاك

الحياه حتبقي في حجرك بجد

Post a Comment