Tuesday, September 1, 2009

CH3









سيد منصور احد اشهر مدرسي الكيميا في اداره المنتزه التعليميه بس مش بيشتغل في سنتر عبود لانه ميكفيش العدد الرهيب اللي بياخد عنده ، بيعمل مجموعه تقويه في المدرسه كزكاه عن صحته بحيث بيخفض السعر من 150 جنيه لحد 40 جنيه للطلبه الغير مقتدره وطبعا العدد محدود وبيعملو للناس كشف حاله هل ينفع يخش المجموعه دي ولا في حالات تستاهل اكتر منها .

عصام علي مدرس كيميا في نفس مدرسة سيد منصور هو مدرس عادي عدد الطلبه اللي بياخدو درس خصوصي عنده برده عادي في المعقول واكيد شهرته لا تقارن بسيد منصور علي الاطلاق وهو معترف بذلك ودايما بتيجي علي شفته ابتسامه ساخره خفيفه لو شاف مذكرات سيد منصور ذات الغلاف المصقول اللامع في ايد واحد من الطلبه في الفصل عنده او لو شاف الطلبه وهي بتجري ورا سيد منصور في الحوش علشان تسلم عليه مجرد ابتسامه ولا يمكن ان تتجاوزها الي سب او لعن او حقد ينفس في وجود طلبه درسه الخاص او حتي بين مدرسين الكيميا العاديين زيه اللي عدد الطلبه في الدرس الخصوصي عندهم عادي برده .

احمد السيد ده طالب عادي بيزق علشان يلحق علوم او هندسه لو الحظ جامله ، الظروف الماديه متعثره شويه مع اهله فبيضطر يعس في المعاهد علي مدرسين كويسين وبسعر معقول بدل الدروس الخصوصيه  اللي اكيد مش حيتحمل تمنها ، احمد اكيد هو اول طالب حجز عند سيد منصور في مجموعه التقويه وهو متاكد انه حيجيب 50 كيميا واللي بيدي احمد كيميا في الفصل استاذ عصام ... صدفه ملهاش اي معني خالص.

طب هي مجموعه الالكيل ch3 مشبعه ولا غير مشبعه؟؟!!

 ده اول سؤال يجي في دماغ احمد بعد اول حصه في الكيميا العضويه عند سيد منصور،  عادة سيد منصور مش بيجاوب علي اسئله في الحصه لان وقته يدوبك مخصص للشرح علشان يلحق المجموعه اللي بعدها اللي عامله دوشه بره قاعه الشرح  ، احمد سأل استاذ عصام كحل بديل استاذ عصام بكل حسن نيه قاله مشبعه وشرح وجهه نظره .

احمد اصر انه يسأل سيد منصور اللي جاوب بكل اريحيه وثقه مطلقه غير مشبعه وشرح وجهه نظره برده بس أحمد مقتنعش برأيه زي ما اقتنع براي استاذ عصام لحد هنا مفيش مشكله الازمه بقي جت لما قال لسيد منصور انا مش مقتنع بوجهه نظرك وشرحله وجهه نظر استاذ عصام مع ذكر اسم عصام في اخر الشرح .

سيد منصور قلع البالطو (هو بيشرح علي السبوره ببالطو علشان الطباشير ميبهدلش بدلته ) ومرضيش يكمل الحصه علشان ازاي شاب غر ساذج زي ده يعدل عليه ويقعد يجادله قدام الطلبه ويستشهد بوجهه نظر مدرس اقل ما يوصف به انه عادي شعبي في منه كتير.

تاني يوم استاذ عصام جايب مرجع لاحمد ومخطط تحت سطرين بالقلم الازرق علي الكلام اللي يثبت ان مجموعه الالكيل مشبعه وقال الكلام ده جهرا قدام الطلبه في الفصل اللي نصهم بياخد عند سيد منصور ولسه علي وجهه الابتسامه الساخره .

الحصه التاليه لسيد منصور في مجموعه التقويه دخل من غير بالطو وكان معاه مرجع وراح مقوم طالب وخلاه يقرا سطرين متخطط عليهم بالازرق برده بيثبتو ان الالكيل مجموعه غير مشبعه ولما الواد خلص السطرين سيد منصور سلم علي الطلبه وروح ومكملش الحصه.

سيد منصور طرد احمد السيد من المجموعه واحمد كان كله حماسه انه يذاكر لوحده ويجيب 50 كيميا من غير سيد منصور.

استاذ عصام فضل زي ما هو مدرس عادي وعدد الطلبه عنده في الدرس الخصوصي برده فضل عادي .

سيد منصور كمل مجموعه التقويه وكل العيال جابت 50 وبيفكر يفتح سنتر قريب .

احمد جاب 40 كيميا ودخل كليه تجاره وملحقش لا هندسه ولا حتي علوم بس هو استفاد حاجه واحده وفهمها كويس اوي 

  " ان مجموعه الالكيل حتفضل طول عمرها مشبعه عند استاذ عصام وحتفضل برده طول عمرها غير مشبعه عن سيد منصور"
Post a Comment