Tuesday, September 29, 2009

شقه





منا مقدرش اصاحبك من غير ما اعرف مساحه شقتك وعندك بلكونه ولا لأ
اقولك

شقه من 40 الي 60 متر البشر اللي فيها ليهم مواصفات خاصه عن شقه من 70 الي 90 انما 100 متر وانت طالع دخلت في حته تانيه
من 40 الي 60 متر الناس يا تخينه اوي يارفيعه اوي تخين ده بيحب القاعده في البيت بس مفيش مساحه يتحرك فيها انما لو رفيع ده مبيقعدش اصلا في البيت طول النهار بره من الخنقه
من 70 الي 90 دايما بيكون جسمهم كويس كرش صغير بس انما السمنه محدوده
من 100 وطالع يتلاعب بهم القدر براحته وملهمش شكل محدد
من 40 الي 60 مش متداخلين اوي مع الناس لانهم مبيعرفوش يعزمو حد ولو عزموه بيبقو مكسوفبن طول الوقت ومتكتفين فبيزورو ومش بيتزارو
من 70 الي 90 موضوع ان حد يجي الشقه ده لازم يكون لحاجه ضروريه الولد عنده امتحانان وصاحبه جي يذاكر معاه او عازمين نسايبهم انما برده متقفل عليهم العيال بقي بتبقي خبيثه بيعزمم صحابهم لما باقي الناس تبقي بره ويبرتعو هم بقي
من 100 وطالع بيلعب علي الحته دي عند باقي التصنيفات يعزم ابو 40 او ابو 90 ويتفشخر وهو متاكد ان التاني مش حيعرف يرد الزياره او مش حتكون بنفس الاريحيه العيال مش حتلعب في اوضه لوحدهم مفيش سفره بعيده عن الانتريه فبيزل الفئتين الادني اوض العيال بتبقي دايما اماكن تجمع الاصدقاء لانهم بيكونو مفصولين عن باقي الشقه(مساحه بقي)
واكيد اللي عنده بلكونه علي الشارع غيراللي عنده بلكونه في الزقاق اللي جنب الشارع غير اللي معندوش خالص البلكونه في الزقاق بتخليك سوس بس لانها غرضها الاول اعلان شيء ما زغرطه وقت النجاح او الخطوبه عراك مع الجيران نشر الهدوم الجديده المغسوله في اول المنشر انما فرجه واسترخاء مش دورها( دي صوره ثابته يا عم) اللي علي الشارع بتبقي اخلاق الناس وثقافتهم اقرب لثقافه الزحام اللامبالاه الثقه بالنفس البلكونه مقفوله اغلب الوقت ثقه في اعطاء العنوان لاي حد (مهو علي الشارع بقي) شديد الثقه بنفسه لدرجه انه ممكن يدي سواق مشرع عصافره بحري 75 قرش ويزعل بجد لما الراجل مياخدهمش منه طب اللي معندوش بلكونه بتلاقيه هادي جدا مش متوتر الشقه نضيفه اوي لانه عارف انه معندوش متنفس الا علي المنور يبقي يهدي ويؤدي واجبه صح لانه مش حيلاقي اوكسجين كافي في حاله النرفزه والفرهده ودايما ستاره شباك المنور بيكون ليها اثر كبير في ذكرياته بعد كده


تعالي ضم موضوع البلكونه علي موضوع المساحه تقدر تتطلع بمواصفات شخصيه لناس كتيير من مجرد معرفه مساحه الشقه ومكان البلكونه
عرفني بلكونتك اقولك انت مين
Post a Comment