Saturday, September 27, 2008

كل سنه وانت طيب


مشهد 1

الله اكبر الله اكبر يا عزيز يا رب ياه لسه حنطلع السلم ده كله هما ليه عاملين المسجد في الدور الاول كده امال الناس العواجيز الذي حالاتي يعملو ايه بس

يا حاج يا حاج

ايوه يا ابني

انا صعبان غليا طلوعك الدور الاول بص علي اليمين حتلاقي رصه كراسي اختار واحد اقعد عليه

ربنا يكرمك يا ابني بس حسمع ازاي

حاطين سماعات

الله يباركلك

بعد انقضاء الصلاه.....

كل سنه وانت طيب يا حاج

وانت طيب يا ابني

حاج كل سنه وانت طيب هه

منا رديت وانت طيب

2 جنيه بس لزوم الكرسي

ايه؟

والله انت عارف يا حاج بتوع الفراشه مش راحمنا وانت عارف بقي موسم كل سنه وانت طيب

حوار بين مصلي وخادم المسجد اثناء صلاة التراويح

*المسجد هو الجامع في اخر 5 سنوات

مشهد 2

ايه يا عم الزحام ده كله

منت عارف بقي الشيخ حاتم الله يباركله مسمع كويس السنه دي

للدرجه دي

امال الشيخ صوته رخيم وجميل وبصراحه هنا الناس المقتدره مبتبخلش كانزات وزبادي وتمر وكله ببلاش يعني بتصلي وترطب

مش تقول طب يلا نلحق مكان في الخن اللي هناك ده

وبعد انقضاء اربع ركعات التراويح والاستراحه الطويله نسبيا.........

ايوه اللي عايز شاي شاي ايوه اللي عايز شاي

لو سمحت كوبايتين

سكرك ايه

زياده واالله

اتفضل

شكرا

مش بقولك هنا الخير ايه ربنا يزيد الناس الطيبه دي

كله ببركه الشيخ حاتم

بعد انقضاء صلاه الشفع وفي انتظار الوتر......

ايوه يا حضرات اللي عنده حساب هنا ايوه يا استاذ

نعم

مش حضرتك طلبت 2 شاي

اه

يبقي جنيه ونص انشاء الله

مش فاهم

تمن الشاي

هو مش ببلاش يعني حاجه كده بمناسبه رمضان

لا وااله مكنش ينعز وكل سنه وانت طيب

*الشيخ حاتم :امام منتدب من احد جوامع منطقه ثروت للصلاه بالناس في مسجد القائد ابراهيم

مشهد 3

فنهايه الجامع حيث تصطف مجموعه الدكك الخاصه بكبار السن

اثناء الدرس في الفاصل بين الاربع ركعات

ركبت ايه الصبح

والله اخدت مشروع اصل الاتوبيس بتاع الشركه فاتني

ولقيت دي كانت زحمه اوي

ربك سهل والله ايام مفترجه

متعرفش كشف المرتبات وصل ولا لاء

والله انا شوفت حمزه بتاع الخزنه كان معاه ورايح يصرف اخر النهار

يعني ان شاء الله القبض بكره انت عارف العيد والعيال عايزه هدوم وكحك

في الخلفيه بعض الاطفال يتحدثون بصوت مرتفع اثناء الخطبه

يلا يا واد منك له بره المسجد ايه الدوشه دي مش عارف اسمع الدرس منكم قله ربايه صحيح

خلاص مشيو دول عيال برده كل سنه وانت طيب

وفي النهايه نختم المشاهد بالقول الماثور

(خلي بالك زيزو مش وحش)


Post a Comment