الم خفيف زي ازازه شفافه فيها رساله تتنقل بهدوء من شاطيء لشاطيء

انا اشتركت في عرض كنترول 25 تبع شركه فودافون ده بيديك 1000 دقيقه لارقام فودافون و 60 دقيقه لبقية الناس ومفيش رسايل .

في الغالب الشهر بيخلص وبتلاقي انك مخلصتش دقايق الفودافون ودقايق الغير فودافون خلصت بعد اول اسبوع  ، في الحالات اللي زي ديه لما بتزنق وعايز ابلغ حد مش فودافون حاجه ضروريه بعمل الاتي :

·       بكتب اللي عايزه اقوله في ورقه A4  بيضا .

·      بجيب ازازه شفافه معلهاش اي استيكرات او الوان وانشفها من جوه كويس وشرط ان تكون الازازه رقبتها ضيقه .

·      املي الازازه دي برمله صفرا او زلط صغير لارتفاع 3 سم

·      بحط الورقه ال A4 جوه الازازه وبجيب فلة بتاعت ازازه نبيت قديمه واقيفها علي مقاس فتحه الازازه واسدها بيها واروح لافف سكوتش حوالين الفتحه اللي مقفوله بالفلة كذا لفه علشان متسربش اي حاجه للورقه .

·      بروح لحد شاطيء سيدي بشر 2 قدام المحروسه كده واروح رامي الازازه في الميه في مكان بعيد عن الصخر

في الغالب الازازه بتوصل للحد اللي انا عايز ابلغه الرساله لانه غالبا بيكون واقف يشم هوا علي البحر في كيلوباترا او الشاطبي .

في صديقه ليا بتشتغل مصوره سينمائيه كتبت ال C.V.  بتاعها في ورقه وحطيته في ازازه ورميتها في البحر وبعد اسبوع جالها جواب من بلطيم من واحد بيقولها انه لاقي الازازه بتاعتها وطلب منها انها تبعتله  صور ومجلات وكتب عن السينما  ،  صديقتي استجابت وبعتتله اللي هو طلبه  ، بعد شهرين جالها جواب من الراجل بتاع بلطيم بيقولها ان الحاجه اللي هي بعتتها كانت هايله وهو قراها كذا مره وذاكرها كويس جدا وقرر ان يعمل ورشه سينما في بلطيم . 

نادي المعلمين

(1)

هو كان بيشتغل في ورشه الخراطه بتاعت ابوه وبياخد يوميه 30 جنيه مربي شعر راسه اللي فوق القفا مباشره و بيحب يشرب ستيلا عند صاحبه في جراج في سابا باشا علي البحر وهو بيسمع اغاني حميد الشاعري اللي كان بيحضر كل حفلاته وبيشتري كل شرايطه  ،  مرافق مدرسه مطلقه من شودس  ، نزيه وبيحب ياكل كبده من عند ابو غريب  ويشرب زبادي خلاط علي قهوه وادي النيل قدام سينما راديو  ، هو اللي اقنعني اني اخش صنايع بدل ثانوي عام وخلاني البس سلسله فضه وخرجني مع بت من دوري كانت ساكنه جنب الورشه اللي شغال فيها واداني يومها 20 جنيه علشان اتفسح انا وهي J

كان ليه طقس اسبوعي انه كل يوم حد ( اجازته الاسبوعيه ) يروح مع صاحبته المدرسه المطلقه نادي المعلمين ياكلو جيلاتي في الشتا او ينزلو البحر في الصيف ،  لما عرف اني سمعت كلامه ودخلت صنايع بدل ثانوي عام فرح جدا وجابلي شريط حميد الاخير( كواحل ) وعزمني انا وصاحبتي والمدرسه علي جيلاتي في نادي المعلمين .

**********

(2)

وانا صغير مكنتش باكل غير من ايد امي ولما كنت اروح ابات عند عمتي  في الصيف كنت اقضيها نواشف علشان طبيخ عمتي مبيعجبنيش لحد لما في مره عمتي راحت مشوار الصبح وسابتني عند ام غريب جارتها اللي اكلت عندها طبيخ اول مره بره بيت امي ، ام غريب عندها طبعا غريب ابنها الكبير مدرس صنايع في مدرسه محمد علي الفنيه المتقدمه وعندها ولدين وبنت تقريبا من دوري ، من بعد لما عجبني طبيخ ام غريب تقريبا بقيت بقضي الصيف عندهم بدل ما اقعد عند عمتي ، غريب كان عامل كارنيه نادي المعلمين لامه علشان تودي اخواته الصغيرين البحر ، كانو بيروحو يوم اه ويوم لأ وكنت بروح معاهم وبحب سندوتشات العيش الفينو اللي محشيه كفته وبطاطس اللي كانت بتعملهالنا ام غريب  ، اختهم اسمها غاليه كانت مضفره شعرها وعينيها عسلي وكانت بتحب تسمع مني اغاني حسن الصغير وبتحب تلاعبني كريزي 8   ، اول امبارح وقعت في ايدي صوره ليا ولام غريب وعيالها التلاته واحنا واقفين علي شاطي نادي المعلمين وانا حاطط ايدي علي كتف غاليه وفي ايدي ساندوتش فينو غالبا فيه كفته علي بطاطس ساعتها بس اكتشفت ان ام غريب مش قريبتي اصلا وان عيالها لو شافو الصوره حيستغربو  ويقولو مين الولد ده اللي متصور معانا في نادي المعلمين .

**********

(3)

كان دايما في بيت العيله فيه صباح الاخت الكبيره اللي متجوزتش اللي كانت بتساعد خالتي في الغسيل وفي الاكل ودايما كانو اخواتها البنات الاصغر منها احلي منها ، انا وولاد خالي كلهم بنتجمع في بيت العيله علشان نشوف بنات خالاتي نزبط خروجه لانطونيادس او المعموره بس دايما صباح كانت بتصر تودينا نادي المعلمين علي الكارنيه بتاع امي  وكنا بنوافق علشان منجرحش احساسها كامراه تعدت الثلاثين بدون محاوله خطوبه  ، اتذكر ان بنات خالاتي مكنوش بيلبسو حجاب لما نيجي عندهم وقشطه انهم يقعدو بالجلاليب المكشوفه معانا نلعب الشايب ونسمع شريط سوسنه في البلكونه ، كان فيه احتكاكات غير بريئه طول الوقت سواء في البلكونه او في انطونيادس او حتي في نادي المعلمين وكان في غض طرف عن ده من كل افراد الاسره ( محدش كان قامط في التسعينات ) .

امي جابت عريس لصباح مدرس شغال مع امي في المدرسه لسه منقول من كفر الدوار مبقالوش شهر ، امي قررت ان نادي المعلمين يكون مكان اللقاء الاول ، بحيث ننزل البحر وهو يشوفها وهي بالشورت الاستريتش الاسود الشهير وفانله سفن اب البيضا المرسوم عليها ( فيدو ديو ) المكسمه عليها ، طبعا لما شافها عجبته وعزمها علي سفن في كافيتيرا النادي ، تقريبا امي شافته وهو بيخطف بوسه مشبك من صباح بس طنشت J

دلوقتي صباح عندها ولدين واي عريس بيجي لاخواتها البنات بتخليه يقابلهم الاول في نادي المعلمين .