طب مفيش اعلانات جوجل ليه في البلوج ؟ شريط علي الجنب كده وتطلع مصاريفك منه بس كده فين التميز لمدونه ليها وزنها زي بنيكه شاي طبيعي ان حتي مصادر الاعلان حتكون غير تقليديه بل والادهي انها حتكون شعبيه وده اللي بناكل عليه عيش هنا والصوره اللي بنحاول نصدرها
مغسله الجنرال وذكريات المندره
طبيعي انك في الصيف وانت في رابعه ابتدائي علشان تجيب تمن السلبس اللي بتلعب بيه كوره بتوزع اعلانات مغسله الجنرال بعد صلاه الجمعه في جامع رب عائشه والناس لسه مسابتش حصير الصلاه
وانت في اعدادي جارك بعتك تجيب البدلهاللي مأجرها من مغسله الجنرال قبل فرحه بيوم وظرفك 5 جنيه
وانت في ثانوي اكيد روحت مغسله الجنرال تضيق بنطلون المدرسه الجينز من عند الرجلين علشان تـأفزه في الجزمه السيفتي او في الفلاته النايك البيضا
بعد مشاورات مع الحاج جلال صاحب المغسله اتفق انه حيعلن هنا في البنيكه واي عروض حينزلها الحاج حنبقي ننوه عنها في حينه
الحياه بتتكرر بالملي ديجافو غريب زي اللي بنقرا عنه بس يمكن لاختلاف الاشخاص الموضوع خد منحي مختلف
قبل معرض اسكندريه الاخير كنت كتبت امنياتي قبل المعرض تقريبا في 5 نقط اربعه عدو بسلام وواحده عملت لغط كتيير احب اكررها للتوضيح بس
نرجو ان يخلو المعرض من الخرفان اللي بتعينهم دور النشر امثال الكاركتر اللي فوق اللي اخره يقف في شارع القاهره يبيع ملوخيه متقطفه للستات اللي معندهاش وقت تقطف علشان بيرجعو متاخر من الشغل(ممكن يبيع ملوخيه ناشفه ويخلص)
الراجل اللي كانت محطوطه صورته اتضايق (طبيعي جدا) وبعتلي علشان يعرف سبب الشتيمه وايه سابق العلاقه المشتركه بينا وبين بعض علشان اشتمه بالشكل ده ولمح في سياق الكلام برفع دعوي سب وقذف عليا بسبب السطرين اللي فوق
بعدين توسط بعض الاصدقاء (الجدد) لمعرفه سبب السب المجهول خصوصا لتحول الشخص نفسه من عامل لدي دار نشر الي صاحب دار نشر وان موضوع التدوينه ده اثر الي حد ما علي سمعته كناشر خصوصا وهو لسه ناشر مبتديء فمن حقه يعرف السبب (طبيعي اكتر ومن غير مكسبات طعم ولا لون)
يبقي نجر خط ومن اول السطر
فاكرين موضوع الدكان اللي بيفتح في شارع طويل فاضي واول ما يبتدي يمشي سوقه والبليه تلعب معاه يفتح جنبه دكان تاني زيه بالظبط والغريبه انه يمشي ويتحول المكان لسوق تجاري(مول) كله شغال وبيرزق
مدونات فيس بوك كتاب دور نشر كتب معادله منطقيه
الموضوع كان هذار وفجاه بقي جد من حكمه اليوم لاستيتوس في الفيس بوك لتعليق ظريف لنوت لطيف لتدوينه حالمه لكتاب لامع مصقول وكاتب جديد ودار نشر محتاجه تبيييييييييييييييييييييييييع اكوام الكتب اللي مرصوصه بقت فلوس واكل عيش وارزاق وخطوط حمرا وزرقا
انا معنديش مشكله خالص واحد بيكتب وبيدفع والتاني بينشر وعايز يكسب فبيجيب بياع كتب
بياع كتب
هنا بقي ممكن تسمع تعليقات من عينه
تحب ارشحلك حاجات كويسه
ده ابن خاله الطيب صالح متجرب
كتاب القدم لمحمد علاء شغال زي الفل السنه دي ايه رايك
ده صاحب مدونه بنيكه شاي ومنزل كتاب هايل متدوس حيعجبك
خد القدم و وعنبر واعملك خصم 20%
زي ما المدونات والفيس بوك واللعبه دي ناس رزقت منها لازم ناس تتلط منها كده تبقي الحياه منطقيه وعادله زي ما من حقك ....... عليا في المعرض وفي الفيس بوك وفي النيل الثقافيه وفي otv وفي مكتبه اكمل وفي الجزويت وفي مكتبه اسكندريه وفي التجاريه والبوابين وفي اخبار الادب وفي مدونات مصريه للجيب وفي اي سبوبه تانيه ظهرت بعد 2004 ليه مش سايبني ...... عليك من نفسي شويه اركب حبه وركب اخوك حبه ومتزعلش لان كلنا لسه جوه اللعبه مخرجناش منها دايره كلنا بندور فيها اللي بيلحق ينط بينط وده منطقي وطبيعي
كل الحكايه ان الشخص لعب معايا دور البياع السنه اللي فاتت وده ضايقني جدا فتمنيت باسلوب صادم وحشي قاسي عنيف بذيء اني ميحصليش نفس الموقف ده السنه دي
ارجو ان الصوره تكون وضحت للشخص وللوسطاء
ملحوظه:
1 النقط دي مكانها شتيمه بس خفت احطها للعقوبه تزيد من سنتين لتلات سنين وانا ليا جيش اصلا
2 وارجو انه ميكونش البوست الاخير في البلوجوان ملاقيش بكره في مدونه بنت القمر بانر (لماذا يؤخذ الكلام للمحكمه) وتحتيه صوره الراجل العجوز
3 بصراحه الراجل من حقه يعرف السبب يمكن يتعطف علينا و يأجل القضيه لحد الاجازه الصيفيه اهو بدل التدريب في العامريه نتدرب في الحضره
