جيكوزاه

· مش هو اللي بيعرف يجيب القرش من الهوا او بيعرف يجيب عقدعمل في الخليج

· مش هو البهلوان اللي بيضحك اللي حواليه طول الوقت واعصابه هاديه وفي شعره جل ولابس تيشرت بولو من موباكو

· مش هو الجذاب ذو النظره الساهمه الحالمه اللي بينشر في ميريت بعلبه سجاير ال ام وولاعه زيبو وراكن الماتريكس بره وبيقعد في كلاي كافيه

· مش هو اللي لو اتعاركت في الشارع مع واحد صايع حيعرف يجيبلك حقك

· مش هو اللي بيعرف يركب المشروع في الزحمه

انما ممكن يكون اللي معاه قلم ازرق وورقه في جيبه علي طول علشان يلحق رقم الصيانه بتاع شركه ايديال علشان الغساله الفول اوتوماتيك السخان بتاعها باظ

او اللي بيعرف يملا شهادات الميلاد واستمارات القبول بالمدارس واستمارات البطاقه الشخصيه بدون اخطاء

او اللي بيقول لمراته حيطبخو ايه بكره بكل حماسه وهو بيشوف نشره 9

اللي مش بيقعد علي القهوه او يشرب سجاير علشان يوفر تمن الفلوس لجمعيه مدارس العيال الخاصه

اللي بيروح مكتبه في الشغل لمده 40 سنه بالقطار القميء دون تذمر علشان يقعد في مكتب مترين في متر ومعاه عشره موظفين زيه

هو اللي بيخلي عياله يركبو ابونيه(ميكروباص مخصوص)علشان ميتبهدلوش زيه

هو اللي بيروح يجيب التموين كل شهر من غير العيال ما تحس وبيتصرف في10 ارغفه يوميا برده علشان العيال متقفش في الفرن

هو اللي جاب لابنه مايك علشان يكلم صاحبته علي الياهو وهو مش عارف يجيب سماعه صيني يسمع بيها اخبار خفيفه علي الراديو الساعه 9 الصبح

هو اللي مش حتلاحظه في الشارع خالص ولا اللي حيعجبك كلامه خالص

وحتقول يا رب مش عايز اعيش زيه