Wednesday, May 6, 2009

صرف صحي















كمواطن سكندري اصيل تثار العديد من التساؤلات في ذهنه دائما ومن اهم هذه التساؤلات كيف كانت الحياه في الاسكندريه قبل شبكه الصرف الصحي وبعد البحث والاطلاع عثرنا علي كشكول  ابراج الكويت بها مذكرات احدهم يرويها علي شكل قصه ترجع لسنه 1940


روح يا علي ازعقلنا اي عربيه نزح من المكتب اللي علي القمه
اجيب ام حصان رمادي
اللي يريحك

يذهب علي وياتي بعربه يجرها حصان رمادي يعلوها خزان اسطواني متربع عليه ثلاثه بضحكه بلهاء ينزل اثنان منهم ويبقي الاخر مكانه متململ

هو ده البير
ايون
ايدك معايا

لينفتح غطاء البير وتبدأ عملية النزح ، تونايه صفيح مزنوق فيها عصايه خشب مربوط بها حبل يدليه احد الرجال داخل البير ليمتليء بما لذ وطاب ثم يصعد بالتونايه الي الجزء الاسطواني من العربه ليفرغه فيه وتستمر العمليه عده مرات متتابعه حتي منسوب معين يليها صيحه من احد اثنين لثالثهم المتململ

تعالي كده يا سعد ينفعك كده
اه تمام اتكلو انتم علي الله 

تنصرف العربه ويتركون ثالثهم اذهب مع العربه حتي يجدو بربخ عمومي لافراغ حصيلتهم في لحظات من الترقب والحذر من افراد المحافظه وعيونهم ولهم في ذلك مسلكين
1 مد خرطوم الي البربخ للتفريغ البطيء مع تدخين سيجاره وهذا في الايام الخواليه الخاليه من تكدس عمل

2 وسطنه سنتر العربه فوق فتحه البربخ مباشره ثم فتح طاقه في منتصف العربه لافراغ الشحنه دفعه واحده

ولسوء الحظ لم اشهد الطريقه الثانيه التي بالتاكيد ستحمل الكثير من المتعه البصريه اعود للبيت لاجد البير مازال مفتوحا وكثير من المتحلقين حوله يراقبون في رهبه وإجلال انظر لاجد ثالث الثلاثه (بلبوص) داخل البئر يخرج المترسبات الثقيله وغائص لثلثيه في البير وفي فمه سيجاره يلوكها باستهتار اثناء تاديه عمله ، انه يسبح في خراء بالمعني الحرفي للكلمه والادهي ان له مزاج لتدخين سيجاره يخرج من البئر بعد اتمام المهمه وفرش الارضيه بالرمل الاصفر وينظر لنا طالبا استخدام الحمام للاستحمام 

لم اعثر علي باقي المذكرات وان لاحظت ان اخر ثلاث ورقات (متعاصه)


كمواطن سكندري اصيل تثار العديد من التساؤلات في ذهنه دائما ومن اهم هذه التساؤلات كيف كانت الحياه في الاسكندريه قبل شبكه الصرف الصحي وبعد البحث والاطلاع عثرنا علي كراسه  الشربيني2000 عليها صوره السفينه تيتانك بها مذكرات احدهم يرويها علي شكل قصه ترجع لسنه  1980


يا ابني متلعبش ناحيه الطرنش

يا ابني روح ادفع فلوس الطرنش

هات لنا التموين من عند عم عبده بتاع الطرنش

كس ام الطرنش هو احنا ما ورناش غيره محرم علينا الشارع ومكدرنا بريحته بدخانه بالكور اللي بيبلعها في بحيرته بتعابينه اللي محاصرنا في كل مكان اللي ممتده لحد المصرف المجاور الا لعنه الله علي الطرنش 

مش عجبك الطرنش يعني كنت عايزنا ننزح زي زمان صحيح البطران عيشته قطران

لا عيشته طرنش 

طب دانا كنت مع الناس لما اقترحو الفكره ، الصرف لا مواخذه بيتشفط وانت قاعد في بيتكم بتسمع علي الناصيه لأمال فهمي 

لم اعثر علي باقي المذكرات وان لاحظت ان اخر ثلاث ورقات (متعاصه)


كمواطن سكندري اصيل تثار العديد من التساؤلات في ذهنه دائما ومن اهم هذه التساؤلات كيف كانت الحياه في الاسكندريه قبل شبكه الصرف الصحي وبعد البحث والاطلاع عثرنا علي سكيتش 120 ورقه عليه صوره (الجولد برج) بها مذكرات احدهم يرويها علي شكل قصه ترجع لسنه 2006


السلام عليكم

وعليكم حضرتك 125 الخط الساخن لشركه الميه

ايون خير حضرتك 

لو سمحت المياه قاطعه بقالها 6 ساعات 

حضرتك ساكن فين

امبروزو

خلاص حشوف الموضوع وأرد علي حضرتك

تتكرر هذه المحادثه ما يزيد عن 9 مرات بنفس الديالوج تتخللهم متابعه اخر اخبار افراد 30 فبراير علي النت حتي الساعه 4 من صباح اليوم التالي


الو الاداره العامه لشركه المياه

ايون امر حضرتك 

الميه/امبروزو/قاطعه

خد نمره الباشمهندس عوض رئيس القسم الهندسي للحضره انت 010؟

الو باشمهندس عوض معايا

ايون حضرتك امر

الميه /الاداره/الحضره

لا والله انت تبع شرق خد نمره الباشمهندس خليل انت 010؟ 

الو باشمهندس خليل معايا

ايون حضرتك امر

امبروزو/الميه/ الحضره/عوض

اه فعلا الماسوره مكسوره بس مش مننا دول بتوع الصرف ودي تالت مسوره من امبارح واحنا فتحنا الميه ساعه شكلك ملحقتش تتشطف

ده حقيقي



لم اعثر علي باقي المذكرات وان لاحظت ان اخر ثلاث ورقات (متعاصه)

Post a Comment