Wednesday, January 7, 2009

اتعلم الزيانه في راس اليتامي


اتفضل يا بيه في كرسي فاضي
(تنفضين بالمريله علي الكرسي اللي حقعد عليه من جانب الحلاق)

طلباتك؟

حاجه كده علي ذوقك ومتخفليش اوي

تمام
(يربط نفس المريله اللي نفض بيها حولين رقبتي)

ماسك او حاجه

ماسك ايه؟

تحبيشه كده تبع المحل بنعملها علي ايدينا !

لا شكرا

بعداشعال السيجاره واخذ نفس عميق ثم اعمال الماكنه في راسي
بدون النظر اليها مفضلا الحملقه في الفراغ

يا عم حاسب مش قولتلك متخفش ظبط بقي الباقي بالمقص

اصل يا بيه الحلاقه دي نضافه والواحد لازم يخف جامد علشان
يحس انه حلق

محسسني ان انا خروف

ميصحش يا بيه بس الواد من دول لو مجلطوش ابوه يرجعهولي
تاني اصل هي حلاقه واحده في الشهر

الله يعينك

بقولك عايز ماسك؟

يا عمي لا مش عايز متشكرين

حاسب ايه ياعم مقص السمك ده

لا مؤاخذه تلاقيه اتلخبط مع عدتي ده بتاع ابراهيم بيحلق بيه
للعيال الصغيره!
اعملك ماسك؟

اتجاهله تماما

ممكن سؤال؟

اتفضل

انت قافل زرار ياقه القميص ليه كده؟

علشان الشعر مينطش في صدري
تبعتها ابتسامه عريضه خبيره

بقولك ايه؟

أمر يا بيه

اعملي ماسك



No comments: