افيالجو

الكتابه دائما عن الاقليات العرقيه ومشاكلها بياكل مع الناس وبيثير تعاطف الجماهير وبالذات الخوض في فكره التهميش والاضطهاد المؤسسي او المجتمعي واي محاوله لأثبات عكس ده او تبسيط الامر وجعلها قضيه عامه غير محصوره ومقصوده لفئه معينه بتحول النقاش او المقال لشيء بضين غير جذاب للقارئ المتحمس لسماع حواديت الاضطهاد والتهميش وعلشان كده النهارده في يوم التدوين عن النوبه ححاول اجيب ( كصص ) وحواديت عنصريه تعجبكم وتسري عنكم وحدتكم وفي نفس الوقت ممكن تكون سبب في ان ورق الهجره بتاعي يتقبل علي اساس اني اتبع اقليه عرقيه ومضطهد  في دوله ناميه نجح فيها تيار الاسلام السياسي في تولي الحكم والحبرشه علي الاقليات .

اللقب

اي مراهق نوبي لازم يكون مره لبس في واحد اطلق عليه لقب سامبو او زنجيري ، قله بتطلقها من باب التلطف والدعابه ولكن الغالبيه بتقولها كنوع من الدفاع عن النفس المتاح دائما في حالات الخساره من المراهق النوبي سواء في ماتش بلاي ستيشن او في مناقشه كلاميه ودايما اللقب ده بيعجب الاخرين علي اساس ان المراهق ده فعلا سامبو او زنجيري

الفقره النوبيه

كونك حبه سمرا بيفرض عليك انك تكون حامل لواء الفقره النوبيه في اي فرح جوربتي بتروحه ، الجماهير العنصريه بتفرض عليك انك تقعد تتهز وتتحرك حركات سرياليه بمجرد ما الدي جي مان يشغل نعناع الجنينه او شمندوره او حتي كده كده يا تريلا في فتره سابقه .. هنا بقي بتحسد الاصدقاء الجوربتيه اللي قاعدين يتفرجو علي الفقره النوبيه اللي بتقدمها وهما بيضربو الشربات ومتشفيين فيك

ضد الشمس

القناعه اللي مترسخه عن الجماهير العنصريه ان البني ادم المواطن الطبيعي بيستخبي من الشمس ويقف في الضل علشان بس ميسمرش ، علشان كده انت لو اسمر من المنطقي انك تترمي في الشمس اطول فتره ممكنه بدون اي شفقه علشان موضوع السمار ده مش فارق معاك اساسا لانك اسمر اساسا .... اي عمل يتطلب الانتظار في الشمس لفترات طويله بيصدرو الحبه السمرا دايما  وبتبقي الضماير مرتاحه

حلوه بس سمره

متخيل تماما تحطم طموح اي فتاه سمراء في الارتباط بشاب جوربتي ابيض علشان امه وأصحابه مش حيرضو انه ياخد واحده سمرا خصوصا ان الحاجه وصاحبات الحاجه في المسجد بيجيبوله عرايس بيضا زي القشطه والزند بتاعهم مش باين وعرقوب القدم ملفوف ومربرب

اللغه

دايما الاحراج بيكون لما تقعد وسط الشله وبعدين يجي شاب جوربتي يقول جمله بسرعه ومحدش يفهمها يقوم واحد رادد عليه ويقوله " متبطل تتكلم زي البرابره يا فلان " ويروح باصصلك ويقولك " لا مؤاخذه مش قصدي عليك والله " وابتسامه صفرا بت وسخه

اصحاب شباب الجمعيه

حمله دبلومات الثانوي الفني او التجاري من النوبيين في فتره الثمانينات واوائل التسعينات بيتلمو علي اوسخ فئه من شباب الجوربتيه لان بيكون عندهم احساس ساحق بالدونيه وبالتالي فئه الجوربتيه الوسخه دي هي اللي بترضي تصاحبهم ، النوبيين اللي معاهم دبلومات دول بيروحو جمعيات القبائل وبيشاركو في الانشطه وبيطلق عليهم لقب شهير " شباب الجمعيه " الفئه دي بالاضافه لغبائها المطلق بتجيب الاوساخ الجوربتيه دول يشاركونا في الانشطه وبيطلعو ميتينا ، جيل شباب الجمعيه دي تجاوز ال 40 ولسه بيطلق عليهم لقب " شباب الجمعيه " ولسه هما واصحابهم الجوربتيه الاوساخ بيزاحمونا في الانشطه



جوربتي : يقصد بها الغير نوبيين 

الصور للعزيز شكري مناع