بيت جنب سور الشركة

 

 

 

في الخمسينات والستينات كان فيه جرأة وتنوع في اختيار الأماكن اللي حيتبني عليها مصانع القطاع العام في إسكندرية بصورة مدهشة‮ ‬،وكان فيه توزيع أدوار علي مساحة المدينة كلها‮. ‬

الناس بتحب تسكن جنب شركات القطاع العام‮ ( ‬حقيقة علمية‮ ).‬

‮ ‬دايما فيه ملعب كورة نجيلة العمال في الشركة بيلعبوا عليه والسكان اللي حوالين الشركة برضه بيلعبوا عليه وعيالهم بتبقي في فريق الشركة‮. ‬

‮ ‬فيه حضانة جُوَّه الشركة لعيال الستات اللي بتشتغل في الشركة والسكان حوالين الشركة بيتسمحلهم بده برضه‮.‬

‮ ‬في المناسبات والمواسم الشركة بتدبح عجول،‮ ‬بتوزَّع حلاوة موسم،‮ ‬بتفرَّق أجندات ونتايج علي العمال والسكان اللي حوالين الشركة‮.‬

‮ ‬أثناء الدراسة شركات القطاع العام بتطلَّع أتوبيسات تبعها تنقل سكان المنطقة اللي حوالين الشركة لوسط البلد حيث أماكن تجمع الكليات والمعاهد‮. ‬

‮ ‬إنت ممكن تبني كشك علي سور الشركة تبيع شاي وسندوتشات للعمال،‮ ‬تعمل دولاب مخدرات،‮ ‬أي سبُّوبة وماحدِّش حيركِّز معاك‮. ‬

‮ ‬كل العيال اللي في مدارس صنايع أو معاهد فنية من المنطقة اللي حوالين الشركة ضامنين تدريبهم في الشركة،‮ ‬لأ وبياخدوا مرتبات كمان أثناء فترة التدريب‮ .‬

‮ ‬كل شركة بيبقي فيها قاعة للندوات والأنشطة الفنية وبتقلب قاعة أفراح لأهالي المنطقة بالليل‮.

..... ‬وغيره كتير‮! ‬

‮ ‬وبالتالي شركات القطاع العام كانت من أهم العوامل اللي ساعدت علي التمدد الأفقي العمراني لمدينة الرب وساعدت علي التنوع العمراني والاجتماعي ليها‮ .‬

اسكندرية للحراريات ونيازا والزيوت والصابون راحت علي المحمودية في منطقة النزهة فنشأ حواليها منطقة‮ «‬البر التاني‮» ‬و‮ «‬الحضرة الجديدةب‮. ‬

بيسكو مصر والشركة العربية للغزل والنسيج‮ (‬بولفارا‮) ‬وشركة النشا راحت منطقة السيوف فاتخلقت العوايد وشارع الشركة العربية وأبوسليمان‮.  ‬

أسمنت بورتلاند وإسكندرية للبترول راحت طريق المكس فظهر وادي القمر‮. ‬

الشركة الشرقية للكتان ومطاحن شرق إسكندرية راحت منطقة الراس السودا فظهرت أرض تشاكوس والجزيرة الخضرا والفحيرة ودربالة عموما‮. ‬

العامة لصناعة الورق‮ (‬راكتا‮ ) ‬راحت علي خط رشيد الساحلي فظهرت الطابية‮.‬

كل منطقة من دول ليها طابع مختلف عن التاني تماما يعني

 

سكان وادي القمر فيهم خشونة في التعامل وحدة في الطباع،‮ ‬البيوت معظمها دور واحد ولونها كابي حزين عكس مثلا دربالة وأرض تشاكوس؛ البيوت ألوانها فاتحة وجنب كل بيت فيه حتة أرض صغيرة فيها كام زرعة بائسة،‮ ‬والبيوت تحس فيها بطابع فلاحي بيحاكي صناعة الكتان اللي قايمة علي منتج زراعي‮.‬

الطابية في قلب منطقة زراعية تلاقي كل سكان الطابية سُمر لغتهم أقرب للصعيدي منها للفلاحي ماحدِّش فيهم بيزرع،‮ ‬البيوت هناك مافيهاش حوش ولا زريبة،‮ ‬ارتفاع العمارات بيتجاوز الأربع والخمس أدوار‮ (‬نسخة مشوهة من المعمورة‮) ‬اللي هي أقرب منطقة حضرية ليهم‮.‬

لما الحكومة توقفت عن بناء مصانع جديدة بقي فيه محاولات لإنشاء تجمعات سكنية حوالين المجمعات الصناعية الخاصة الكبري في برج العرب والعامرية ومرغم‮  ‬فظهرت‮  «‬السفن‮» ‬و«المستعمرة‮» ‬و«عبدالقادر‮» ‬و«توشكي‮». ‬المناطق دي لسه لحد دلوقتي مش قادرة تحدد شكل ليها وطابع خاص يخليها تتجاوز فكرة كونها مجرد منطقة عشوائية ومرتع للجريمة بالصورة الفجة المستهلكة،‮ ‬يمكن لتطرف تلك الأماكن في البعد عن وسط البلد أو لأنها لسه محتاجة وقت علشان تكوِّن الطابع الخاص ليها،‮ ‬بس بالنسبة ليَّ‮ ‬السبب الأهم إن مصانع القطاع الخاص مافيهاش نفس الروح‮ ‬السمحة الطيبة المبهجة لمصانع القطاع العام‮.

 

 

تنويعات ع الخض او ما يعرف بإشكالية القشطة واللبن الرايب والشرش

اللبن بعد لما بيتحلب مباشرة بيتحط في " طاجن " ويتغطي ويتساب علي جنب لمدة يومين تلاته حتلاقي ان الطاجن اتقسم لتلات مستويات : قشطة علي السطح ، تحت منها لبن رايب ، في القعر سائل يسمي شرش

انت بتجيب اللبن تغلية وتسيبه يبرد وتحطه في التلاجة تلاقية راح عامل طبقة " قشطة " علي السطح وشكرا علي كده لا فيه شرش ولا فيه لبن رايب ( التسخين خسرنا كتير )

Ø  القشطة :

القشطة اللي اتكونت دي لو اتاخدت واتقلبت بالمعلقة لفترة طويلة حتتحول لكتل زبدة و وشرش ( في ناس تقولك " نخض " القشطة في قربة من جلد ماعز .. الكلام ده صح برده مش غلط بس قديم والناس بطلت تشتغل بالطرق دي )

الزبدة دي لو اتسيحت علي النار تتحول لسائل علي السطح وكتل صلبة في القعر ، السائل اللي علي السطح لو سيبته شوية في الهوا حتلاقية يجمد ويبقي سمنة بلدي واللي اتكون في القعر ده اسمه المورتة  ( في ناس بتحط القشطة مباشرة علي النار وتقلبها فتطلع معها سمنة بلدي ومورتة من غير المرور بمرحلة الزبدة .. صح بردة بس ليه نخسر مادام في ايدينا نكسب )

Ø  اللبن الرايب :

·      بص علشان اللغط والتشويش في معلومة حتتقال صح اقبلها دلوقتي وبعدين فكر فيها براحتك وايمانك حيقودك لنفس النتيجة " اللبن الرايب هو هو الزبادي "  ، ممكن تروح السوق وتشتري حاجة اسمها حصيرة جبنة ودي عبارة عن حصيرة صغيرة بيتحط جواها اللبن الرايب وتتعلق في فراغ الغرفة علشان بعد يومين ولا تلاتة تلاقي اللبن الرايب ده اتحول لجبنة قريش وبتبقي خارطة الجبنة القريش مشرشرة علشان واخدة شكل الحصيرة

·       اللبن الرايب لو اتحط علية ملح وفلفل احمر وشطة سوداني واتساب لفترة حيبقي  " مش "

·      الجبنة القريش لو حطيتها في قماشة وعلقتها في الجو وسيبتها تنزل المية اللي فيها وتنشف اكتر وبعدين تاخدها تحطها في "بلاص" وتحط  عليها " مش " وتركنها فترة كبيرة في البلاص ده (اقل حاجة 6 شهور مثلا ) حيطلع عندك ما يعرف ب " الجبنة القديمة " ( في ناس تقولك بدل ما تعلقها في قماشة علشان تنشف وتنزل المية اللي فيها دفي الفرن وحط الجبنة في الفرن حتنشف بصورة اسرع واقل زروطة .. الكلام ده برده صح )

Ø   الشرش :

 بيستخدم في الخبيز بصورة عامة ومتميز في خبيز نوع من العيش الفلاحي اسمة " الرقاق " وساعات الستات بتحطه علي الجبنة القديمة او المش علشان يقلل ملوحته شوية

خطايا المعمورجية

المعمورجية الاوائل كانو شعب الله المختار وعلشان كده ربنا سكنهم في المنطقة المحصورة بين محطة قطر المعمورة وجامع السادات ووهبهم مساحات شاسعه من الارض الرملية المناسبة لزراعة الجوافة والبشملة والزبدة والقشطة والبامبوزيا .

اول ما تنزل علي المعمورجي الاول من وحي كان انه يقسم ارضه اجزاء ويزرع في كل جزء محصول شِكل ليه ميعاد حصاد مختلف عن التاني علشان يقدر يبيع ويكسب طول السنة .

المعمورجية طول تاريخهم عملو تلات خطايا كبري فربنا عاقبهم بالتيه  ، الناس دلوقتي متقدرش تحدد بالظبط فين المعمورة وبتتلغبط بينها وبين طوسون والاصلاح وعزبة الماكينة وبقت الناس بتسمي العب ده كله (المعمورة البلد ) علشان تنساه وينساهم

عايز تعرف خطايا التيه ... عايز تتسلي وانت بتاكل حلاوة " الرشيدي البغبان" ... عايزتضيع الوقت وانت بتضرب بوظة من " امية " في المندرة  .

ححكيلك بس مش عشان الاسباب اللي فوق  ،  انا ححكي علشان لما تروح تسكن في ارض فرعون ولا في العزبة البحرية ولا في الكيلو 26 او حتي في السفن متكررش نفس الخطايا وتتوه زي ما تاه المعمورجية

الخطية الاولي : -

خضت العياب لعلي اشبع

وَاسْأَلْهُمْ عَنِ الْقَرْيَةِ الَّتِي كَانَتْ حَاضِرَةَ الْبَحْرِ إِذْ يَعْدُونَ فِي السَّبْتِ إِذْ تَأْتِيهِمْ حِيتَانُهُمْ يَوْمَ سَبْتِهِمْ شُرَّعا وَيَوْمَ لَا يَسْبِتُونَ لَا تَأْتِيهِمْ كَذَلِكَ نَبْلُوهُمْ بِمَا كَانُوا يَفْسُقُونَ

المعمورجية كان ليهم حب غريب لسمك " البلميطة "  اللي كان بداية دخوله مصر في الستينات علي ايد اساطيل صيد روسية كانت بتصطاده من اعالي البحار وبيخش مصر في  كراتين مكتوب عليها بالروسي وعلشان كده المعمورجية كانو بيسموه " السمك الروسي "

المعمورجية متعودين في شرا السمك انهم ينقو عدد معين من الاسماك وزي ما يطلع وزنهم يحاسبو عليه ، انما في السمك الروسي كنت بتشتري بالكيلو وبالتالي كنت ممكن تلاقي نفسك واخد سمكتين وديل او تلات سمكات وراس كبقية ميزان .

فتنة السمك الروسي انتشرت واستمرت لدرجة ان المعمورة كلها بقت مبتكلش غير " بلميطة " ، كانو عارفين ان العذاب حيتنزل عليهم لانهم كسرو الناموس بس سعر وحلاوة " البلميطة" كانت اقوي من الجميع

الخطية الثانية :-

ومدعشر بالقحطلين تحشرم

شرب طاه تفشخر الفشخاط

وَاتَّخَذَ قَوْمُ مُوسَىٰ مِنْ بَعْدِهِ مِنْ حُلِيِّهِمْ عِجْلًا جَسَدًا لَهُ خُوَارٌ ۚ أَلَمْ يَرَوْا أَنَّهُ لَا يُكَلِّمُهُمْ وَلَا يَهْدِيهِمْ سَبِيلًا ۘ اتَّخَذُوهُ وَكَانُوا ظَالِمِينَ

لازم تبقي فاهم ان المعمورجية هما جزء من شعب اكبر اسمه "البورجية" ودول سكان المنطقة المحصورة من اول المعمورة لحد ابو قير ودول كلهم كان ليهم لغة محدش بيفهمها غيرهم .

في الحرب العالمية التانية وقعت قنبلة في ارض زراعية  في المعمورة جنب بغل مربوط في نخلة قصيرة ، القنبلة موتت البغل ونطرته لفوق النخله

منظر البغل الميت فوق النخلة خلت المعمورجية تؤمن انه ممكن يكون ولي او ليه كرامات وارتجلو دعاء منغم بلغتهم  الخاصة للبغل مازال كل البورجية والاسكندرانية  بيعايروهم بيه لحد دلوقتي

الخطية التالتة :-

ادام تظلم ... ادام تلبس

تُثِيرُ الْأَرْضَ وَلَا تَسْقِي الْحَرْثَ مُسَلَّمَةٌ لَا شِيَةَ فِيهَا

في قلب المعمورة كان فيه مقلب زبالة كبير وكان المعمورجية بيسرحو المعيز بتاعتهم ترعي في مقلب الزبالة ده

المعيز بتحب طعم البلاستيك فتاكله بس المشكلة ان معدتها مش بتهضمه فبيفضل البلاستيك جواها ، المعيز من الحيوانات المجترة يعني بتطلع الاكل من معدتها تمضغه لوحده او مع اكل جديد وترجعه تاني فيبتدي البلاستيك يتجمع مع بعضه ومع الايام يتكور فينفخ بطنها فتبان للناس انها عُشر

هنا قرر المعمورجية انهم يعملو سوق يوم السبت للمعيز الٌعُشر بس

عمارة هيكل

محمود عبد السيد كان مدير الوحده الطبية في شركة راكتا وكان بيشتغل بعد الضهر في عيادة الدكتور العمروسي في عمارة هيكل يحجز الكشوفات ويسوق عربية الدكتور

جمال عزب دكتور مخ واعصاب قرر انه يأجر عيادة دكتور العمروسي ومحمود عبد السيد ويحط يافطه معدنية علي جدار عمارة هيكل في اول شارع امين فكري علشان ينضم رسميا لألهه الطب بمدينة الرب

خيري السمرة استاذ مخ واعصاب في القصر العيني بعد لما كشف علي جمال مبارك طلب من مبارك نفسه انه علشان يتأكد ويطمئن اكتر يستدعي دكتور من اسكندرية اسمه جمال عزب

اخر دورين في عماره هيكل كانو عباره عن فندقين فوق بعض " ايليما هاوس " و " هايد بارك "

الخبرا الروس اللي كانو شغالين في القوات البحرية ايام عبد الناصر كانو معاهم نوته صغيره فيها اسعار اللبن والعيش والجبن والحلويات علشان لما يشترو مستلزماتهم من محل " السد العالي "  - اللي هو جزء من مبني سينما راديو -  قبل ما يطلعو فندق هايد بارك اللي كان الجيش حاجزلهم غرف فيه بصورة دائمة يبقو عارفين هما حيدفعو كام بالظبط لعم مصطفي شاطر صاحب المحل

البنات بتوع مدرسة المنار اللي فاتحه في نفس الشارع اللي فيه عمارة هيكل كانو بيشترو الكراسات والحلويات من عند عم مصطفي بس علشان هو كان بيدلعهم وبيعلمهم ازاي يعاكسو الولاد بالنوبي 

البوابين بتوع عمارة هيكل مكنوش نوبيين كانو كلهم صعايدة من الخطارة وكان في واحد مخصوص لنضافه السلم وواحد لمتابعه الاسانسيرات والعماره كان ليها بابين واحد للسكان والزوار والتاني كان للخدامين واللي شغالين في الفندقين اللي فوق

لما مؤسسه الرياسه استدعت جمال عزب علشان يأمن علي كلام خيري السمرة مبارك شاور علي محمود عبد السيد وقال لعزب مين ده ؟؟ راح الدكتور ضحك وقاله ده دراعي اليمين وتخيل يا سيادة الريس كان عايز يسيبني ويهاجر امريكا راح مبارك رادد وقاله ده احنا نجيبهولك من علي سلم الطياره

الخبرا الروس كانو دايما بيلبسو شرابات قطن وصنادل صيف شتا ودايما بيفطرو باكو بسكوت وازازه لبن سيكلام فعلشان عم مصطفي يسهل عليهم الدنيا عمل جوا المحل درج بيتشد لبرا يتفتح علشان يحط عليه الراجل الروسي ازازه اللبن اثناء ما هو بياكل البسكوت وبحيث يكون ضهره ليه علشان الراجل الروسي ميتحرجش وهو بياكل

ديموس

ديموس كان شعره ناعم وتقيل فكان بيطوله ويسيبه كده حر ورا ضهره وكان مكنف دمبلين 15 ووزن وبار زجزاج علي السطوح كان بيتمرن بيهم كل يوم بعد العصر فتلاقي جسمه كان شادد ومقسم

كان بيروح يصطبح في الجمعية النوبية في شارع ابن الخطاب في محطه مصر هو وصاحبه صالح وكان بيبير مع صاحبهم التالت علاء في الجراج اللي في سابا باشا قدام نادي المهندسين ايام ستيلا ما كانت بتنزل ازايز بني

كان شغال في ورشة ابوه من وهو في اولي اعدادي وبالتالي لما راح مدرسه محمد علي الصناعية كان متصيت فشخ لانه كان اسرع احد يخلص التمارين المطلوبة منه رغم انه مبيحضرش حصة الورشة اساسا

اوضته كانت مدهونة اسود ومليانه بوسترات حميد الشاعري اللي مكنش بيفوتله حفله او شريط ومغيرش لونها الا بعد الواقعة الشهيرة لما في عيد ميلاده صالح وعلاء جابو الساوندات الخشب الطويله دي ومايك علشان يحتفلو بيه وسربو بت شرموطه من " المأوي " شربت معاهم دبوس في الاوضه ولما راحت منها مسكت المايك وقعدت تغني وابوه قطع علي الحوار وشال بوسترات حميد وبيض الاوضه ازرق .

ديموس كان مصاحب اخت صالح وكان بيروح هو وصالح واخته وعلاء البحر قدام وردة العصافرة كل يوم حد وصالح مكنش قافش خالص وبعدين يروحو يشربو تفاحة كاختراع جديد في قهوة  "حموده"    في ضهر قهوة "والي " في شارع تانيس

ديموس راح ليبيا سنة  ولما رجع اتجوز من شارع الجواهر في الحضرة ولسه شغال في الورشه بتاعت ابوه ومضيع فلوسه علي الفاكهه والكفته المشوية

• الصور من الاسكتدرية 1980 بعدسة manfred lentz